Бухоро вилоятида бир нечта туман ҳокимлари ўзгарди. Улар орасида «зўравон ҳоким» номи билан танилган Қоракўл тумани ҳокими Шерали Саломов ҳам бор, дея хабар бермоқда «Дарё» мухбири.
Бухоро вилояти ҳокими матбуот хизматининг маълум қилишича, 22 декабрь куни Халқ депутатлари Қоракўл тумани кенгашининг навбатдан ташқари сессияси бўлиб ўтган.
Унда Қоракўл тумани ҳокими Шерали Саломов эгаллаб турган лавозимидан бўшатилган. Сессия ишида вилоят ҳокими Ботир Зарипов туманда амалга оширилаётган ишлар кўлами салмоқли бўлса-да, саноат, хизмат кўрсатиш ва сервис соҳаларини ривожлантириш, тадбиркорликни қўллаб-қувватлаш орқали янги иш ўринларини яратиш ва аҳоли учун муносиб турмуш шароитини яратиш борасида мавжуд имкониятлардан етарлича фойдаланилмай келинаётганини таъкидлаган.
Шерали Саломов 2020 йилнинг 29 февраль куни Қоракўл туманига ҳоким этиб тайинланган эди. Унга қадар Олот тумани ҳокими лавозимида ишлаган ва фермер билан жанжаллашиб, уни дўппослаб ургани важи билан «зўравон ҳоким» номи билан танилган.
Расман тасдиқланмаган маълумотларга кўра, Шерали Саломов Қорақалпоғистон Республикасига масъул лавозимлардан бирига ишга тайинланиши мумкин.
Шерали Саломов ўрнига Ромитаннинг собиқ ҳокими Хуршид Тоҳиров тайинланган. Хуршид Тоҳиров 1976 йилда Ромитан туманида туғилган. 2001 йилда Бухоро озиқ-овқат ва енгил-саноат технологияси институтини ҳамда 2007 йилда Тошкент Молия институтини битирган. Мутахассислиги — транспорт воситаларидан фойдаланиш ва молия. У меҳнат фаолиятини 1995 йилда Ромитан тумани молия бўлими ҳисобчиси сифатида бошлаб, 2001—2005 йилларда Ромитан тумани молия бўлими бош ҳисобчиси, 2005—2017 йилларда Ромитан тумани молия бўлими мудири ва молия бўлими мудири ўринбосари, 2017—2019 йилларда Ромитан тумани ҳокимининг биринчи ўринбосари лавозимларида ишлаган.
Сессия иши Шофиркон туманида давом этган. Мазкур сессияда 2020 йилнинг 8 февралида Марказий банк вилоят бош бошқармаси бошлиғи лавозимидан туман ҳокими этиб тайинланган Шукурулло Ҳакимов ҳам вазифасидан озод этилган. У жорий йилнинг 29 сентябрь куни вилоят раҳбари Ботир Зарипов томонидан 5 нафар туман ҳокимига хайфсан берилганда «Дарё»га «Кўплаб мурожаатлар уюштирилган ҳолда ташкил этилгани ойдинлашди», дея интервью берган эди.
Шофиркон тумани ҳокими вазифасига Марказий банк вилоят бош бошқармаси бошлиғи Жамшид Шаропов тайинланган. У 2005 йилда Бухоро давлат университетини ҳамда 2009 йилда Тошкент давлат иқтисодиёт университетини битирган. Мутахассисилиги — иқтисодчи. Меҳнат фаолиятини 2002 йилда «Пахтабанк»нинг вилоят бошқармаси мутахассиси сифатида бошлаб, «Agrobank»нинг вилоят бошқармасида бўлим бошлиғи ўринбосари, Бухоро шаҳар филиали бошқарувчиси, 2014—2020 йилларда «Agrobank»нинг вилоят бошқармаси бошлиғи лавозимларида ишлаган.
Изоҳ (0)