Buxoroda spirtli ichimlik iste’mol qilib, mast holatda hamqishlog‘iga og‘ir tan jarohati yetkazib, uning o‘limiga sababchi bo‘lgan fuqaroga sud hukmi o‘qildi. Fuqaro avvaliga o‘z jinoyatiga iqror bo‘lmagan. Bu haqda “Daryo”ga Jinoyat ishlari bo‘yicha G‘ijduvon tuman sudi sudyasi Boborahim Ochilov ma’lum qildi.
Ta’kidlanishicha, G‘ijduvon tumanidagi Sarmijon qishlog‘ida yashovchi fuqarolar Mansur Sharipov va uning qaynukasi Xoliq Ro‘ziyev hamda Shavkat Sharopov (ism shariflar asliga to‘g‘ri)lar uzoq yillardan buyon ustachilik bilan shug‘ullanib kelgan. Ular bir necha oydan buyon ishlab kelishayotgan xonadondagi ta’mir va bezash ishlarini yakunlab, mahalladagi choyxonalardan birida o‘tirishga o‘zaro kelishgan.
Ustalar ovqatlanish barobarida spirtli ichimliklar ham iste’mol qilgan. Xuddi shu paytda choyxona oldidan o‘tib ketayotgan hamqishloqlaridan biri Tilav Hojimurodov ham ularning davrasiga kelib qo‘shilgan. Tilav Xoliqqa pul berib, uning hisobidan yana bir shisha aroq olib kelishini talab qilgan. Xoliq esa boshqa ichmasligini va dam olish uchun uyiga ketishini bildirgan va ular og‘zaki tortishib qolgan.
Xoliq uyiga ketmoqchi bo‘lib choyxona darvozasidan chiqqan vaqtda Tilav uning orqasidan kelib urgan va ikki o‘rtada janjal boshlangan. Janjal o‘zaro qattiq mushtlashuvga aylangan. Tilav Xoliqni duch kelgan joyiga mushtlab urib, do‘pposlab yerga yiqitgan va oyoq, qo‘l va boshlariga qattiq zarbalar bilan tepgan. Shavkat va Mansur ularni ajratgan.
Mansur qaynukasi Xoliqni ham mast, ham og‘ir tan jarohati olgan ahvolda o‘z uyiga olib ketgan. Oradan ko‘p o‘tmay, Xoliqning o‘g‘li Azamat Rashidov voqea joyiga kelgan va Shavkatdan “Nega otamni urasizlar?” deya baqirib ketgan. Shavkat Xoliqning o‘g‘li Azamatga Tilavning aybi bilan ular mushtlashishganini, pochchasi Tilavni uyiga olib ketganini va boshqa hech narsani eslay olmayotganini aytgan.
Ayni ular gaplashib turishganiga hali bir necha daqiqa o‘tmay turib, ularning oldiga tez tibbiy yordam avtomashinasi kelib to‘xtagan va tibbiy xodimlar fuqaro Mansur Sharipovning uyi qayerda ekanini so‘rashgan. Shunda pochchasining uyida hush-behush yotgan otasining ahvolidan xabardor Azamat sarosimaga tushib qolgan va tez yordam mashinasiga o‘tirib, ular bilan birga Mansurning uyiga kelgan.
Tibbiy xodimlar yetib kelgan, bemorni tezkor birlamchi ko‘rikdan o‘tkazgan va uning bir necha daqiqa oldin vafot etganini bildirgan. Voqea joyiga yetib kelgan tuman ichki ishlar bo‘limi xodimlari marhumning peshona va burun sohalaridagi jarohatlar, uning lablari ko‘karib ketgani bilan qiziqishgan va tezkor surishtiruv ishlarini olib borgan.
Marhumni jasadni saqlash bo‘limi (morg)ga olib ketilgan va uni sud tibbiy ekspertizasi ilmiy-amaliy markazi viloyat filialida ekspertiza qilingan.
Ekspertiza xulosasiga ko‘ra, marhum Xoliq Ro‘ziyev badanida bosh miya ikkala yarim sohasidagi subdural, ya’ni qattiq pardaosti qon quyilishi, bosh miya lat yeyishining og‘ir darajasi, bosh miya va miyacha yumshoq pardausti va ostiga, bosh miya va miyacha to‘qimasiga va qorinchalariga qon quyilishi, bosh miya shishi, peshona o‘rta, burun qirrasi o‘rtasi, o‘ng ko‘z pastki burchak sohasi, o‘ng yuqori qovoq tashqi, og‘iz o‘ng burchagi, pastki jag‘ chap tomon o‘rta sohasidagi shilinmalar, ko‘krak qafasi chap qo‘ltiq osti sohasi old yuzasida va o‘ng yonoq sohasidagi qontalashlar, pastki lab ichki yuzasidagi qon quyilishlar jarohatlari borligi aniqlangan.
Ushbu jarohat og‘irlik darajasiga ko‘ra, inson hayotiga xavf soluvchi og‘ir tan jarohati toifasiga kirishi, jarohatlarning joylashgan o‘rni, xususiyati va relyefiga ko‘ra, marhumning o‘z bo‘yi balandligidan yiqilib tushishga xarakterli emasligi bildirilgan. Shuningdek, marhumning qonidan 2,32 foiz promilli etil spirti aniqlangani, bu miqdor uning o‘limiga olib keladigan va uni tezlashtirishga sabab bo‘ladigan kasallik emasligi haqida ko‘rsatma berilgan.
Sud tergov-surishtiruv jarayonlari avvalida Tilav Hojimurodov Xoliqni faqat bir marta oyog‘idan va bir marta yelka qismidan oyog‘i bilan tepgani, uni boshidan tepmagani haqida vajlar keltirgan. Biroq sud-tergov harakatlari uning barcha vajlarini to‘liq rad etgan va aybdor bu vajlarni javobgarlikdan qutilishga qaratilgan harakat, deb baholagan.
Sudlanuvchi o‘z aybini to‘liq tan olishga majbur bo‘lgan. Tilav Hojimurodov Jinoyat kodeksi 104-moddasi 3-qismining “d” bandlarida nazarda tutilgan jinoyatni (odam o‘limiga sabab bo‘lgan qasddan badanga og‘ir shikast yetkazish) sodir qilganlikda aybli deb topilgan. Ushbu modda bilan unga 9 yil muddatga ozodlikdan mahrum qilish jazosi tayinlangan.
Izoh (0)