Prezident Shavkat Mirziyoyev boshchiligida o‘tkazilayotgan videoselektor yig‘ilishida endokrin kasalliklarni barvaqt aniqlash bo‘yicha alohida dastur qabul qilinishi aytildi. Yig‘ilishda uning doirasida joriy etiladigan yangiliklar ma’lum qilindi, deya xabar bermoqda “Daryo” muxbiri.
2022-yildan 40 yoshdan oshgan barcha aholi (10 million nafar) yiliga kamida bir marta manzilli endokrin skriningdan o‘tkaziladi. Buning uchun, tibbiyot brigadalari va poliklinikalarning 14 mingdan ziyod oilaviy va ta’lim muassasalarining shifokorlari endokrin kasalliklarni aniqlash va birlamchi yordam ko‘rsatishga o‘qitiladi. Har bir tibbiyot brigadasi ekspress-testlar o‘tkazish uchun glyukometr bilan ta’minlanadi.
Prezident, shuningdek, endokrin kasalliklar aniqlangan aholining yagona elektron reyestri ishga tushirilishi, 2022-yilning 1-iyulidan 2 million nafar ayollar, 3–15 yoshdagi bolalar yod preparati bilan bepul ta’minlanishini bildirdi.
“Qandli diabet uchun metformin dorilari 200 mingdan ziyod ehtiyojmand aholiga bepul tarqatiladi (mahalliy metformin narxi – 8 ming so‘m). Masalan, bemorlarga metformin dorisini berish ularda qandli diabet rivojlanishini 10 yilga kechiktiradi”, – deydi Prezident.
Bundan tashqari, bolalar va kattalarni odam insulini bilan bepul ta’minlash dasturi davom ettirilishi, ilk bor 25 yoshgacha bo‘lgan yoshlarga analogli insulin berilishi aytildi. Ma’lumot uchun, bugungi kunda analogli insulin faqat bolalarga bepul tarqatilayotgan bo‘lib, 18 yoshdan keyin odam insuliniga o‘tkazilmoqda. Lekin diabeti bor yoshlar organizmini benuqson shakllanishi uchun analogli insulinni 25 yoshgacha berish zarur.
SSV va Moliya vazirliklariga viloyat hokimlari bilan birga, bir oy muddatda davlat hisobidan diabetik dori vositalarini shaffof tarzda xarid qilish, ularni tashish va saqlash talablariga qat’iy amal qilgan holda, har bir bemorga yetkazish bo‘yicha tizim yaratish vazifasi yuklatildi.
Izoh (0)