“Sanoat energetika guruhi” (SEG) MChJ XK va Kolorado kon maktabi (Davlat ilmiy tadqiqot instituti) o‘rtasida O‘zbekiston Respublikasining Samarqand viloyatida Amerika modeli bo‘yicha, ingliz tiliga asoslangan xalqaro universitet tashkil etish to‘g‘risidagi kelishuv imzolandi.
SEG va jahon tog‘-kon sanoatidagi yetakchi oliy o‘quv yurtlarining biri hisoblangan Kolorado kon maktabi hamkorlikda, O‘zbekiston Respublikasi ta’lim tizimini takomillashtirish bo‘yicha milliy dastur doirasida xususiy universitet tashkil etmoqda.
Samarqand xalqaro texnologiya universiteti (SXTU) talabalarga eng yuqori xalqaro standartlar asosida ta’lim beradi va tog‘-kon sanoati, metallurgiya, gaz-kimyo, neft-kimyo, axborot texnologiyalari, mashinasozlik, shuningdek, tadbirkorlik va yetakchilik kabi yo‘nalishlarda kadrlar tayyorlaydi. Tog‘-kon va energetika sohalari mamlakat YaIMning salmoqli qismini tashkil etadi. Shunga bog‘liq ravishda, mamlakat ichida malakali kadrlar tayyorlashga katta zaruriyat mavjud, bu iqtisodiyot qo‘yayotgan talablarga javob berish uchun muhim hisoblanadi. Shu jumladan, SXTU, Qashqadaryo va Surxondaryo viloyatlaridagi energetika loyihalari, Buxoro viloyatidagi MTT texnologiyalari asosidagi gaz-kimyo majmuasi, Farg‘ona NQIZ, Tebinbuloq va Temirkon metallurgiya loyihalarini ham hisobga olgan holda, O‘zbekiston neft-gaz obyektlari uchun mutaxassislar tayyorlaydi.
“Siyosiy va iqtisodiy modernizatsiya yo‘lida bo‘lgan va ijtimoiy-siyosiy hamda ijtimoiy-iqtisodiy islohotlarni muvaffaqiyatli amalga oshirayotgan Yangi O‘zbekiston uchun ilmiy-akademik hamkorlik va xalqaro ta’lim maydoniga integratsiyalash ulkan ahamiyatga egadir. Inson kapitali har qanday ijobiy o‘zgarishlarning negizidir, aynan shunday loyihalarni amalga oshirish orqali biz qo‘yilgan maqsadlarga erishishda yordam berishi uchun mahalliy korxonalar va davlatga fan sohasidagi iqtidorlarni va yuqori malakali xodimlarni yetishtirib beramiz”, — dedi SEG majoritar aksioneri Baxtiyor Fazilov.
“Kolorado kon maktabi uchun Samarqand xalqaro texnologiya universitetining yaratilishida o‘zining 150 yillik tajribasi bilan o‘rtoqlashish katta sharaf. Energetika sohasidagi global o‘zgarishlar bo‘yicha talablarni qondirish uchun bizga nafaqat AQSh, balki butun dunyoda zaxiralar qazib olish sohasidagi texnik, ijtimoiy, siyosiy va ekologik muammolarni yaxshi tushunadigan yanada ko‘proq olim va muhandislar zarur. Maktabimiz yer zaxiralaridan oqilona foydalanish bo‘yicha eng nufuzli muassasalardan biri bo‘lib, Samarqanddagi universitet qurilishi — bu XXI asr muhandislik ta’limi haqida mushohada yuritish uchun ajoyib imkoniyatdir”, — dedi Kolorado kon maktabi vitse-prezidenti Jon Bredford.
SXTU bakalavriat, magistratura va doktorantura yo‘nalishlari bo‘yicha keng ko‘lamli dasturlarni taqdim etadi. Universitetda kasbiy rivojlantirish uchun turli markazlar faoliyat yuritadi, ular orasida O‘zbekiston tarixi va madaniyatini o‘qitish asosiy o‘rinlardan birini egallaydi. Universitetdagi o‘quv jarayoni Kolorado kon maktabining ta’lim dasturlari va o‘quv rejalari bo‘yicha tashkil etiladi.
2021-yil dekabr oyining boshida Nyu-Yorkda imzolangan kelishuvga muvofiq, Kolorado kon maktabi universitetning akademik mahorat rejasi va o‘quv dasturlarini ishlab chiqishda ko‘mak beradi, kampus infratuzilmasi bo‘yicha tavsiyalar beradi va SXTU ijro rahbariyati hamda o‘qituvchilar tarkibini ishga olishda yordam beradi. Bundan tashqari, maktab Kolorado maktabi qoshidagi McNei — tadbirkorlik va innovatsiyalar markazi namunasi bo‘yicha innovatsion markaz va laboratoriya tashkil etishda ko‘mak beradi.
O‘zbekistonda tog‘-kon sanoati, metallurgiya, neft va gaz sohasida xalqaro miqyosdagi ingliz tiliga asoslangan ta’lim markazini tashkil etish g‘oyasi Baxtiyor Fazilov tomonidan oliy ta’lim va jahon standartlari darajasidagi muhandis xodimlarni tayyorlash tizimini takomillashtirish maqsadida ilgari surilgan edi. SXTU O‘zbekiston rahbariyati va Samarqand viloyati hokimligi tomonidan qo‘llab -quvvatlandi.
Samarqand viloyati hokimligi universitet kampusi uchun Samarqand shahri yaqinidan yer maydonini ajratdi.
SEG to‘g‘risida izohlar
“Sanoat energetika guruhi” (SEG) MChJ XK (avval Jizzakh Petroleum) O‘zbekiston energetika sohasini rivojlantirishni jadallashtirish maqsadida tashkil etilgan. SEG O‘zbekistondagi 105 ta neft konlarini ishlash huquqiga ega. Kompaniya “Gazprom”, Amec Foster Wheeler (Wood), Axens va boshqa shu singari kompaniyalar bilan muvaffaqiyatli hamkorlik qiladi.
Kolorado kon maktabi to‘g‘risida
Kolorado kon maktabi — bu fan va texnika yo‘nalishidagi, talabalarga ta’lim berish va ularni rag‘batlantirish, hozirgi kunda jamiyat duch kelayotgan, ayniqsa, Yer, energiya va atrof-muhit bilan bog‘liq jiddiy muammolarni hal etish uchun bilimlarni ilgari surish va innovatsiyalarni joriy etish bilan shug‘ullanadigan davlat universiteti. 1874-yilda asos solingan va tog‘-kon ishlari hamda metallurgiya ixtisosligi bo‘yicha faoliyat yurituvchi Mines kompaniyasi yetuk bitiruvchilarni yetishtirib, inqilobiy innovatsiyalarni ishlab chiqqan holda, o‘zining faoliyat doirasi va missiyasini kengaytirib, yer zaxiralaridan barqaror foydalanishni ilgari surishda jahon bo‘yicha yetakchi o‘ringa chiqdi.
Barcha suratlar Kolorado kon maktabi tomonidan taqdim qilindi.
Reklama huquqi asosida.
Izoh (0)