«Саноат энергетика гуруҳи» (СЭГ) МЧЖ ХК ва Колорадо кон мактаби (Давлат илмий тадқиқот институти) ўртасида Ўзбекистон Республикасининг Самарқанд вилоятида Америка модели бўйича, инглиз тилига асосланган халқаро университет ташкил этиш тўғрисидаги келишув имзоланди.
СЭГ ва жаҳон тоғ-кон саноатидаги етакчи олий ўқув юртларининг бири ҳисобланган Колорадо кон мактаби ҳамкорликда, Ўзбекистон Республикаси таълим тизимини такомиллаштириш бўйича миллий дастур доирасида хусусий университет ташкил этмоқда.
Самарқанд халқаро технология университети (СХТУ) талабаларга энг юқори халқаро стандартлар асосида таълим беради ва тоғ-кон саноати, металлургия, газ-кимё, нефть-кимё, ахборот технологиялари, машинасозлик, шунингдек, тадбиркорлик ва етакчилик каби йўналишларда кадрлар тайёрлайди. Тоғ-кон ва энергетика соҳалари мамлакат ЯИМнинг салмоқли қисмини ташкил этади. Шунга боғлиқ равишда, мамлакат ичида малакали кадрлар тайёрлашга катта зарурият мавжуд, бу иқтисодиёт қўяётган талабларга жавоб бериш учун муҳим ҳисобланади. Шу жумладан, СХТУ, Қашқадарё ва Сурхондарё вилоятларидаги энергетика лойиҳалари, Бухоро вилоятидаги МТТ технологиялари асосидаги газ-кимё мажмуаси, Фарғона НҚИЗ, Тебинбулоқ ва Темиркон металлургия лойиҳаларини ҳам ҳисобга олган ҳолда, Ўзбекистон нефть-газ объектлари учун мутахассислар тайёрлайди.
«Сиёсий ва иқтисодий модернизация йўлида бўлган ва ижтимоий-сиёсий ҳамда ижтимоий-иқтисодий ислоҳотларни муваффақиятли амалга ошираётган Янги Ўзбекистон учун илмий-академик ҳамкорлик ва халқаро таълим майдонига интеграциялаш улкан аҳамиятга эгадир. Инсон капитали ҳар қандай ижобий ўзгаришларнинг негизидир, айнан шундай лойиҳаларни амалга ошириш орқали биз қўйилган мақсадларга эришишда ёрдам бериши учун маҳаллий корхоналар ва давлатга фан соҳасидаги иқтидорларни ва юқори малакали ходимларни етиштириб берамиз», — деди СЭГ мажоритар акционери Бахтиёр Фазилов.
«Колорадо кон мактаби учун Самарқанд халқаро технология университетининг яратилишида ўзининг 150 йиллик тажрибаси билан ўртоқлашиш катта шараф. Энергетика соҳасидаги глобал ўзгаришлар бўйича талабларни қондириш учун бизга нафақат АҚШ, балки бутун дунёда захиралар қазиб олиш соҳасидаги техник, ижтимоий, сиёсий ва экологик муаммоларни яхши тушунадиган янада кўпроқ олим ва муҳандислар зарур. Мактабимиз ер захираларидан оқилона фойдаланиш бўйича энг нуфузли муассасалардан бири бўлиб, Самарқанддаги университет қурилиши — бу XXI аср муҳандислик таълими ҳақида мушоҳада юритиш учун ажойиб имкониятдир», — деди Колорадо кон мактаби вице-президенти Жон Бредфорд.
СХТУ бакалавриат, магистратура ва докторантура йўналишлари бўйича кенг кўламли дастурларни тақдим этади. Университетда касбий ривожлантириш учун турли марказлар фаолият юритади, улар орасида Ўзбекистон тарихи ва маданиятини ўқитиш асосий ўринлардан бирини эгаллайди. Университетдаги ўқув жараёни Колорадо кон мактабининг таълим дастурлари ва ўқув режалари бўйича ташкил этилади.
2021 йил декабрь ойининг бошида Нью-Йоркда имзоланган келишувга мувофиқ, Колорадо кон мактаби университетнинг академик маҳорат режаси ва ўқув дастурларини ишлаб чиқишда кўмак беради, кампус инфратузилмаси бўйича тавсиялар беради ва СХТУ ижро раҳбарияти ҳамда ўқитувчилар таркибини ишга олишда ёрдам беради. Бундан ташқари, мактаб Колорадо мактаби қошидаги McNei — тадбиркорлик ва инновациялар маркази намунаси бўйича инновацион марказ ва лаборатория ташкил этишда кўмак беради.
Ўзбекистонда тоғ-кон саноати, металлургия, нефть ва газ соҳасида халқаро миқёсдаги инглиз тилига асосланган таълим марказини ташкил этиш ғояси Бахтиёр Фазилов томонидан олий таълим ва жаҳон стандартлари даражасидаги муҳандис ходимларни тайёрлаш тизимини такомиллаштириш мақсадида илгари сурилган эди. СХТУ Ўзбекистон раҳбарияти ва Самарқанд вилояти ҳокимлиги томонидан қўллаб -қувватланди.
Самарқанд вилояти ҳокимлиги университет кампуси учун Самарқанд шаҳри яқинидан ер майдонини ажратди.
СЭГ тўғрисида изоҳлар
«Саноат энергетика гуруҳи» (СЭГ) МЧЖ ХК (аввал Jizzakh Petroleum) Ўзбекистон энергетика соҳасини ривожлантиришни жадаллаштириш мақсадида ташкил этилган. СЭГ Ўзбекистондаги 105 та нефть конларини ишлаш ҳуқуқига эга. Компания «Газпром», Amec Foster Wheeler (Wood), Axens ва бошқа шу сингари компаниялар билан муваффақиятли ҳамкорлик қилади.
Колорадо кон мактаби тўғрисида
Колорадо кон мактаби — бу фан ва техника йўналишидаги, талабаларга таълим бериш ва уларни рағбатлантириш, ҳозирги кунда жамият дуч келаётган, айниқса, Ер, энергия ва атроф-муҳит билан боғлиқ жиддий муаммоларни ҳал этиш учун билимларни илгари суриш ва инновацияларни жорий этиш билан шуғулланадиган давлат университети. 1874 йилда асос солинган ва тоғ-кон ишлари ҳамда металлургия ихтисослиги бўйича фаолият юритувчи Mines компанияси етук битирувчиларни етиштириб, инқилобий инновацияларни ишлаб чиққан ҳолда, ўзининг фаолият доираси ва миссиясини кенгайтириб, ер захираларидан барқарор фойдаланишни илгари суришда жаҳон бўйича етакчи ўринга чиқди.
Барча суратлар Колорадо кон мактаби томонидан тақдим қилинди.
Реклама ҳуқуқи асосида.
Изоҳ (0)