Surxondaryoning Denov shahrida joylashgan ikki qavatli “Indenim” savdo majmuasida 7-dekabr kuni soat 03:57 da portlash sodir bo‘lgandi. Hodisa oqibatida 9 kishi turli tan jarohati bilan shifoxonaga yotqizilgan, savdo majmuasi vayronalari ostidan ikki kishining jasadi topilgan.

Ijtimoiy tarmoqlarda portlash vaqtida hodisa joyidan 2 kilometr uzoqlikda joylashgan ofis kuzatuv kameralarida muhrlangan tasvirlar e’lon qilindi. Lavhalarning birida soat 03:38 da yuz bergan kuchli portlash ovozi va uning zarbidan ofis eshigi ochilib ketgani aks etgan.

Favqulodda vaziyatlar vazirligi axborotiga ko‘ra, hodisa joyiga bosh vazir birinchi o‘rinbosari Ochilboy Ramatov boshchiligidagi hukumat komissiyasi safarbar etilgan. Komissiya tarkibiga IIV, FVV, Milliy Gvardiya, Sog‘liqni saqlash vazirligi va boshqa idoralar vakillari kiritilgan. Ular voqea joyida ish olib bormoqda.