Qashqadaryo viloyatining ayrim hududlarida kam daromadli oilalarni qo‘llab-quvvatlash maqsadida qurib berilgan issiqxonalar hech qancha vaqt o‘tmay qulab tushgan, aholi esa biror foyda keltirmagan issiqxona uchun kredit to‘lovlarini amalga oshirishga majbur bo‘lmoqda.
Nishon tumanidagi Tallimarjon shaharchasida yashovchi Komil Bekmurodov “Daryo” muxbiri bilan suhbatda ma’lum qilishicha, 2019-yil bahorida u va boshqa mahalladoshlari hokimlikka chaqirilib, ularga “aholini boy qilish maqsadida imtiyozli tarzda issiqxonalar qurib berilayotgani” aytilgan. Shundan so‘ng u ham o‘sha vaqtda vaqtincha ishsiz bo‘lgan rafiqasi nomiga 15 million so‘mlik kreditni uch yil muddatga olib, issiqxona qurilishiga rozi bo‘lgan.
Uning ta’kidlashicha, issiqxona boshidan sifatsiz qurilgan. U bu holat ustidan mas’ullarga shikoyat qilganida issiqxonani qurib berayotgan “Nishon yulduzi tomorqa xizmati” kompaniyasi vakillari: “Oilangiz nomiga kredit chiqib ketgan, iltimos, ishni ortga surmang, sifatli qilib topshiramiz”, deb va’da bergan. “Issiqxona talabga javob bersa bo‘ldi, deya ularning iltimosiga xo‘p dedim. Afsuski, 2020-yil noyabr—dekabr oyida qurib bitkazilgan issiqxonalar o‘sha yil 26—27-dekabr kunlari yog‘gan qor oqibatida qulab tushdi”, — deydi Komil Bekmurodov.
Oila boshlig‘i hodisa yuz bergan vaqtdayoq tuman hokimligi, IIB va prokuraturasiga murojaat qilgan. Dastlab mahalla raisi boshchiligidagi ishchi guruh kelib, vaziyatni o‘rgangan va Bekmurodovdan tashqari yana 12 ta xonadonga qurib berilgan issiqxonalar yaroqsizligi, aholi undan daromad ololmayotgani haqida dalolatnoma tuzgan. Nishon tumani hokimi Muxtor Hayitmurodov esa 2021-yil fevral—mart oylarida yo‘llagan javob xatlarida fuqaroning issiqxonalar yaroqsiz chiqqani yuzasidan sudga murojaat qilishi mumkinligini tushuntirgan.
Tuman prokurori Xidir Karimov imzosi 2021-yilning 27-aprel kuni chiqarilgan xatda “Nishon yulduzi tomorqa xizmati” kompaniyasi mansabdori G‘.P.ga o‘ziga ishonib topshirilgan o‘zganing mablag‘larini ishlatib yuborib, budjet mablag‘larini o‘zlashtirish va rastrata qilish yo‘li bilan talon-toroj qilganlikda ayblanayotgani, ushbu holatlar yuzasidan 2021-yil 15-mart kuni jinoyat ishi qo‘zg‘atilgani, fuqaroning shikoyati ham shu jinoyat ishiga qo‘shilgan holda o‘rganilayotgani ta’kidlangan. Ammo prokurorning 2021-yil 11-oktabrdagi javob xatida issiqxona qurib beruvchilar ishi tuman IIB tomonidan 2021-yil sentabr oyida yopilgan.
Fuqaro Bekmurodov mart oyida mavjud bo‘lgan jinoyat alomatlari qanday qilib sentabr oyiga kelib yo‘q bo‘lib qolgani, ish qanday qilib yopib yuborilganini tushunolmay hayron. “Biz boy bo‘lamiz deb issiqxona qurdirib, bor-budimizni ham shu natijasiz kreditga sarflashga majbur bo‘lyapmiz”, — deydi fuqaro.
Nishon tumani hokimligi axborot xizmatidan “Daryo”ga ma’lum qilishlaricha, yuqorida zikr etilgan muammo yechimi bilan tuman hokimligi va tuman Xalq qabulxonasi shug‘ullanmoqda va tez orada muammo yechimi haqida batafsil ma’lumot beriladi.
Said Tavakkalov nafaqat tuman, balki viloyat tashkilotlariga ham shikoyat qilib borgan, “ammo natija yo‘q”. “Issiqxona talabga javob bermaydi. Barcha ekinlarimizga kuydik. Tuman prokuraturasiga murojaat qildik — kelishmadi. Viloyat tashkilotlariga ham murojaat qildik, ammo hech qanday natija yo‘q”, — dedi otaxon “Daryo” muxbiri bilan suhbatda.
Mazkur muammo bilan bog‘liq ma’lumotlar bir muddat avval ijtimoiy tarmoqlarda e’lon qilingan edi. Shundan so‘ng Kitob tumani hokimligi va ushbu oilaga issiqxonani qurib bergan “Kitob yuqori darvoza” kompaniyasi vakillari shikoyat egalarining xonadonida bo‘lgan.
“Ta’minotchi kompaniya rahbariyati aybini tan oldi va fuqaroga issiqxona uchun 25 million so‘m kreditni o‘z hisobidan to‘laydigan, shuningdek, fuqaroning 2 million so‘mlik zararini ham qoplaydigan bo‘ldi”, — dedi Kitob tumani hokimligi matbuot kotibi Qahramonjon Oqilov.
Izoh (0)