Britaniyaning telekommunikatsiya xizmatlari provayderlarini taqqoslashga ixtisoslashga “cable.co.uk” nashri dunyo mamlakatlarining internet tezligi bo‘yicha reytingini e’lon qildi. Bu haqda “Repost” xabar qildi.
Ma’lum qilinishicha, O‘zbekiston 224 davlat orasida 166-o‘rinni egallagan. Mamlakatda 5 gigabaytli fayl o‘rtacha 6,64 Mbit/sekund tezlikda yuklab olinadi.
Qayd etilishicha, MDH davlatlari orasida Rossiya eng yaxshi ko‘rsatkichni qayd etgan — 66-o‘rin. Keyingi pog‘onalardan Ukraina (77-o‘rin) va Belarus (92-o‘rin) joy olgan.
Reytingga ko‘ra, Turkmaniston internet tezligi bo‘yicha so‘nggi o‘rinni qayd etgan. Turkmanistonda 5 gegabaytli faylni yuklab olish taxminan 22 soat 34 daqiqa vaqt talab etiladi.
Ta’kidlanishicha, 2017-yilgi reytingda O‘zbekiston 189 davlat orasida 178-o‘rinni egallagan. 2018-yilda ko‘rsatkich biroz yuqorilab, 200 mamlakat ichida 184-o‘rin band etilgan. 2019-yilda O‘zbekistonda internet sifati yaxshilanib, mamlakat 207 davlat orasida 181-pog‘onani qayd etgan. 2020-yilda O‘zbekiston 221 davlat ichida 200-o‘rinni egallagandi.
Avvalroq “Speedtest.net” servisi 2021-yil may oyi natijalariga oid reytingni e’lon qilingandi. Unda O‘zbekiston mobil internet tezligi bo‘yicha o‘z o‘rnini 4 pog‘onaga yaxshilab, 120-o‘rinni egallagan. Aniqlangan internet tezligi (Fixed Broadband) bo‘yicha esa O‘zbekiston umumiy reytingda uchta pozitsiyaga ko‘tarilib, 180 mamlakat ichida 91-pog‘onani egallagan.
Shuningdek, sentabr oyida O‘zLiDePning X qurultoyida nutq so‘zlagan Shavkat Mirziyoyev kelgusi besh yilda xalqaro magistral internet tezligi va tumanlararo tarmoqlar tezligi oshirilishini aytgandi. “Har bir xonadon va ijtimoiy muassasa maqbul narxda yuqori tezlikdagi internetga ulanadi, magistral avtomobil yo‘llari 100 foiz mobil aloqa va internet bilan qamrab olinadi”, — degan davlat rahbari.
Izoh (0)