Toshkent shahri Mirobod tumanida Bosh prokuraturada boshqarma boshlig‘i o‘rinbosari pora bilan ushlandi. Bu haqda Bosh prokuratura matbuot xizmati xabar qildi.
Qayd etilishicha, O‘zbekiston Davlat xavfsizlik xizmati Bosh prokuratura bilan hamkorlikda tezkor tadbir o‘tkazilgan.
Aniqlanishicha, A.T. Olmaliq ixtisoslashtirilgan prokurori lavozimida ishlagan paytida, 2020-yil oktabr oylarida o‘ziga tanish bo‘lgan qurilish korxonasi rahbari D.A.ni Olmaliq shahridagi 11-sonli yotoqxonani rekonstruksiya qilish bo‘yicha qonuniy o‘tkazilgan tenderda qurilish korxonasi go‘yoki uning yordami bilan g‘olib chiqqaniga ishontirgan va moddiy rag‘bat talab qilib kelgan.
Shundan so‘ng hozirda Bosh prokuraturada boshqarma boshlig‘i o‘rinbosari lavozimida ishlayotgan va 2021-yil 22-noyabrdan mehnat ta’tilida bo‘lgan A.T. 2021-yil 5-dekabr kuni soat 22:00 larda Mirobod tumanida joylashgan “Mustafo” restoranida D.A.dan go‘yoki tenderda yutishiga yordam qilgani uchun 29 ming AQSh dollarini olganida ashyoviy dalillar bilan ushlangan.
Mazkur holat yuzasidan Bosh prokuratura tomonidan A.T.ga nisbatan Jinoyat kodeksining 168-moddasi 4-qismi “a” bandi (firibgarlik) bilan jinoyat ishi qo‘zg‘atilgan.
Hodisadan so‘ng Bosh prokuratura aholiga murojaat bilan chiqdi.
“Bosh prokuratura keng jamoatchilik e’tiborini yana bir bor prokuratura organlarida korrupsiyaga qarshi murosasiz va keskin kurash olib borilayotganiga qaratadi.
Binobarin, Bosh prokuratura mamlakatimizning har bir fuqarosini jamiyatda, xususan prokuratura organlarida korrupsiyani tag-tomiri bilan bartaraf etishda faol hamkorlikka chaqiradi.
Agar prokuratura organlarining biron-bir xodimi faoliyatida korrupsiya bilan bog‘liq xatti-harakat (yoki harakatsizlik)ni kuzatsangiz, sezsangiz, bu haqda zudlik bilan Bosh prokuratura Shaxsiy xavfsizlik boshqarmasining (71) 202-08-28 raqamli “Ishonch telefoni”ga ma’lum qilishingizni so‘raymiz.
Murojaatchilar haqidagi ma’lumotlarning sir saqlanishi to‘liq kafolatlanadi”, – deyiladi murojaatda.
Bundan avval Andijon prokuraturasi xodimi 15 ming dollar pora bilan qo‘lga tushgani, Jizzaxda tuman prokurori o‘rinbosari 8 ming dollar pora bilan ushlangani, Qoraqalpog‘istonda IIV xodimi pora olayotganida qo‘lga tushgani haqida xabar berilgandi.
Izoh (0)