Британиянинг телекоммуникация хизматлари провайдерларини таққослашга ихтисослашга «cable.co.uk» нашри дунё мамлакатларининг интернет тезлиги бўйича рейтингини эълон қилди. Бу ҳақда «Repost» хабар қилди.
Маълум қилинишича, Ўзбекистон 224 давлат орасида 166-ўринни эгаллаган. Мамлакатда 5 гигабайтли файл ўртача 6,64 Мбит/секунд тезликда юклаб олинади.
Қайд этилишича, МДҲ давлатлари орасида Россия энг яхши кўрсаткични қайд этган — 66-ўрин. Кейинги поғоналардан Украина (77-ўрин) ва Беларусь (92-ўрин) жой олган.
Рейтингга кўра, Туркманистон интернет тезлиги бўйича сўнгги ўринни қайд этган. Туркманистонда 5 гегабайтли файлни юклаб олиш тахминан 22 соат 34 дақиқа вақт талаб этилади.
Таъкидланишича, 2017 йилги рейтингда Ўзбекистон 189 давлат орасида 178-ўринни эгаллаган. 2018 йилда кўрсаткич бироз юқорилаб, 200 мамлакат ичида 184-ўрин банд этилган. 2019 йилда Ўзбекистонда интернет сифати яхшиланиб, мамлакат 207 давлат орасида 181-поғонани қайд этган. 2020 йилда Ўзбекистон 221 давлат ичида 200-ўринни эгаллаганди.
Аввалроқ «Speedtest.net» сервиси 2021 йил май ойи натижаларига оид рейтингни эълон қилинганди. Унда Ўзбекистон мобил интернет тезлиги бўйича ўз ўрнини 4 поғонага яхшилаб, 120-ўринни эгаллаган. Аниқланган интернет тезлиги (Fixed Broadband) бўйича эса Ўзбекистон умумий рейтингда учта позицияга кўтарилиб, 180 мамлакат ичида 91-поғонани эгаллаган.
Шунингдек, сентябрь ойида ЎзЛиДеПнинг Х қурултойида нутқ сўзлаган Шавкат Мирзиёев келгуси беш йилда халқаро магистрал интернет тезлиги ва туманлараро тармоқлар тезлиги оширилишини айтганди. «Ҳар бир хонадон ва ижтимоий муассаса мақбул нархда юқори тезликдаги интернетга уланади, магистрал автомобиль йўллари 100 фоиз мобил алоқа ва интернет билан қамраб олинади», — деган давлат раҳбари.
Изоҳ (0)