O‘zbekiston birja savdolarida Ai-80 markali avtomobil benzini narxi tushishda davom etmoqda. 23-noyabr holatiga ko‘ra, 1 tonna shu turdagi benzin narxi 8 million 444 ming so‘mgacha pasaydi, deb xabar berdi Monopoliyaga qarshi kurashish qo‘mitasi.
Qayd etilishicha, 23-noyabr kuni birja savdolarida jami 4196 tonna Ai-80 markali benzin qo‘yilgan bo‘lsa, shundan 3741 tonnasi yoki 89 foizi sotilgan. Benzinining o‘rtacha sotilish narxlari 1 tonnasi 10 million 129 ming so‘mdan 8 million 444 ming so‘mgacha pasayib, 17 foizga arzonlashgan.
Ta’kidlanishicha, kichik 1 tonna lotlar savdosida Buxoro NQIZ tomonidan mahalliy xomashyodan ishlab chiqarilgan benzinning o‘rtacha sotish narxi 7 million 28 ming so‘mgacha pasayib, 16-noyabrga nisbatan 31 foizga arzonlashgan. Sanoat energetika guruhi MChJ QK mahsuloti bo‘yicha pasayish 17 foizni tashkil etgan.
Shu bilan birga, yirik 60 tonna lotlarda narxlar pasayishi tendensiyasi bir muncha sekin kechmoqda va 5 foizni tashkil etgan.
Qayd etilishicha, ommaviy axborot vositalarida benzin narxi oshayotgani to‘g‘risida ma’lumotlar paydo bo‘lgan. Antimonopol qo‘mita buning sababini quyidagicha izohlagan: “Qo‘mita oldinroq vazirlik va idoralar bilan hamkorlikda ko‘rilayotgan chora-tadbirlar bu vaqt talab qiladigan masala. Tabiiyki, ushbu davrda avtomobillarga yonilg‘i quyish shoxobchalari tomonidan ilgari sotib olingan qimmat narxdagi benzin zaxiralari hisobiga yuqori chakana narxlar saqlanib qolishi to‘g‘risida ma’lumot berilgan”.
Ta’kidlanishicha, 16—22-noyabr kunlari pasayib borgan narxlarda xarid qilingan 20 760 tonna mahsulotdan 3409 tonnasi yoki 16 foizi chakana tarmoqgacha yetib borgan.
Eslatib o‘tamiz, 17-noyabrdan buyon birja savdolarida AI-80 benzinining narxida tushish kuzatilmoqda. Shu kuni savdolarda benzin narxi 9 million 365 ming so‘mgacha tushib, 15-noyabrga nisbatan 8 foizga arzonlashgan. 18-noyabr kuni esa 9 million 180 ming 500 so‘mga pasayib, 9 foizga arzonlashgan. 22-noyabr holatiga ko‘ra benzin narxi hamon tushishda davom etmoqda. Birja matbuot xizmatining ma’lum qilishicha, 15–21-noyabr kunlari benzinning kunlik o‘rtacha narxlari mahsulotning bir tonnasi uchun 10 129 400 so‘mdan 9 168 400 so‘mgacha, ya’ni 9,5 foizga pasaygan. 23-noyabr kuni O‘zbekiston birja savdolarida Ai-80 markali benzin narxi bir haftada 15 foizga arzonlashgani ma’lum bo‘ldi.
