Shavkat Mirziyoyevning Toshkentdagi Shayxontohur tumanida joylashgan mahalla va muassasalarga tashrifi — suratlarda

Avval xabar berilganidek, 23-noyabr kuni O‘zbekiston prezidenti Shavkat Mirziyoyev Toshkent shahri Shayxontohur tumanidagi amalga oshirilayotgan mahallalar, bunyodkorlik ishlari, muassasalar faoliyati bilan tanishdi.

Davlat rahbari kutilmaganda “Gulobod” mahallasiga ham o‘tib, mavjud holatni ko‘zdan kechirdi, odamlar bilan suhbatlashdi.

Prezident Shayxontohur tumani Gulobod mavzesiga tashrifi davomida 41-maktabga kirdi.

Shundan so‘ng Shavkat Mirziyoyev “Sarhumdon”  mahallasida “Yashil makon” loyihasi doirasida mahalla oqsoqollari bilan birga ushbu bog‘ga ko‘chatlar o‘tqazdi. Nuroniylar yurtimizga hamisha tinchlik, xalqimizga farovonlik tilab duo qildi.

Shundan so‘ng davlat rahbari Shayxontohurdagi Markaziy ko‘p tarmoqli poliklinikani borib ko‘rdi.

Shavkat Mirziyoyev tashrif buyurgan keyingi joy “Olim Xo‘jayev” mahallasida renovatsiya dasturi boshlanmoqda. Bu yerdagi 2 qavatli uylar eksplutatsiyasiga 65 yil bo‘lgan. Eskirgan uylar buzilishidan oldin bu yerda 9 qavatli uylar quriladi. Uylar to‘liq bitgandan so‘nggina eski uylar buziladi va aholi yangi uylarga ko‘chiriladi. Bitta buzilgan xonadonga bitta yangi xonadon beriladi.

Shavkat Mirziyoyev bu yerda yashovchilarning kayfiyati, bunga munosabatini o‘rganish uchun nuroniy onaxonlar bilan uchrashdi. “Men sizga non bermoqchiman” deb prezidentga nonlar sovg‘a qilgan onaxon sevimli qo‘shiqchim Sevara Nazarxonning ayasi Muhtaramxon Beknazarova bo‘lib chiqdi. Aqlli, samimiy, mulohazali ayol”, deb yozadi ushbu uchrashuvlardan biriga guvoh bo‘lgan bloger Aziza Qurbonova.

Prezidentning kun tartibidan o‘rin olgan so‘nggi manzil Shayxontohur tumanidagi “Real Teks Tashkent” mas’uliyati cheklangan jamiyati bo‘ldi.

Shu yerda Toshkent shahri va tumanlar hokimlari, sektor rahbarlari, mahalla raislari ishtirokida yig‘ilish bo‘ldi. Yig‘ilishda yangi tizim asosida mahallalarda tuman hokimi yordamchisi hamda Toshkent shahar hokimining yordamchisi — yoshlar yetakchisi lavozimlarini joriy etish masalasiga alohida e’tibor qaratildi.