Ўзбекистон биржа савдоларида Аи-80 маркали бензиннинг нархи 1 тоннаси учун 8 млн 444 минг сўмгача тушди

Ўзбекистон биржа савдоларида Аи-80 маркали автомобиль бензини нархи тушишда давом этмоқда. 23 ноябрь ҳолатига кўра, 1 тонна шу турдаги бензин нархи 8 миллион 444 минг сўмгача пасайди, деб хабар берди Монополияга қарши курашиш қўмитаси.

Қайд этилишича, 23 ноябрь куни биржа савдоларида жами 4196 тонна Аи-80 маркали бензин қўйилган бўлса, шундан 3741 тоннаси ёки 89 фоизи сотилган. Бензинининг ўртача сотилиш нархлари 1 тоннаси 10 миллион 129 минг сўмдан 8 миллион 444 минг сўмгача пасайиб, 17 фоизга арзонлашган.

Таъкидланишича, кичик 1 тонна лотлар савдосида Бухоро НҚИЗ томонидан маҳаллий хом ашёдан ишлаб чиқарилган бензиннинг ўртача сотиш нархи 7 миллион 28 минг сўмгача пасайиб, 16 ноябрга нисбатан 31 фоизга арзонлашган. Саноат энергетика гуруҳи МЧЖ ҚК маҳсулоти бўйича пасайиш 17 фоизни ташкил этган.

Шу билан бирга, йирик 60 тонна лотларда нархлар пасайиши тенденцияси бир мунча секин кечмоқда ва 5 фоизни ташкил этган.

Қайд этилишича, оммавий ахборот воситаларида бензин нархи ошаётгани тўғрисида маълумотлар пайдо бўлган. Антимонопол қўмита бунинг сабабини қуйидагича изоҳлаган: «Қўмита олдинроқ вазирлик ва идоралар билан ҳамкорликда кўрилаётган чора-тадбирлар бу вақт талаб қиладиган масала. Табиийки, ушбу даврда автомобилларга ёнилғи қуйиш шохобчалари томонидан илгари сотиб олинган қиммат нархдаги бензин захиралари ҳисобига юқори чакана нархлар сақланиб қолиши тўғрисида маълумот берилган».

Таъкидланишича, 16—22 ноябрь кунлари пасайиб борган нархларда харид қилинган 20 760 тонна маҳсулотдан 3409 тоннаси ёки 16 фоизи чакана тармоқгача етиб борган.

Эслатиб ўтамиз, 17 ноябрдан буён биржа савдоларида АИ-80 бензинининг нархида тушиш кузатилмоқда. Шу куни савдоларда бензин нархи 9 миллион 365 минг сўмгача тушиб, 15 ноябрга нисбатан 8 фоизга арзонлашган. 18 ноябрь куни эса 9 миллион 180 минг 500 сўмга пасайиб, 9 фоизга арзонлашган. 22 ноябрь ҳолатига кўра бензин нархи ҳамон тушишда давом этмоқда. Биржа матбуот хизматининг маълум қилишича, 15–21 ноябрь кунлари бензиннинг кунлик ўртача нархлари маҳсулотнинг бир тоннаси учун 10 129 400 сўмдан 9 168 400 сўмгача, яъни 9,5 фоизга пасайган. 23 ноябрь куни Ўзбекистон биржа савдоларида Аи-80 маркали бензин нархи бир ҳафтада 15 фоизга арзонлашгани маълум бўлди.