O‘zbekistonda 2022-yilda “snos”lar uchun kompensatsiyaga budjetdan 500 milliard so‘m ajratiladi. Bu haqda Moliya vazirligining 2022-yil uchun budjetnoma loyihasiga tayanib, “Gazeta.uz” xabar qildi.
Qayd etilishicha, 2022-yilda Davlat va jamiyat ehtiyojlari uchun yer uchastkalarining olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha jamg‘armasiga Vazirlar Mahkamasi zaxira jamg‘armasi mablag‘larining 15 foizidan kam bo‘lmagan miqdorda, ya’ni respublika budjetidan 500 milliard so‘m mablag‘ ajratish rejalashtirilgan.
Ma’lumot uchun, 2021-yilda bu yo‘nalishdagi xarajatlar uchun 273 milliard so‘m ajratilgan. 2020-yilda esa 215,8 milliard so‘m “snos”dan ko‘rilgan zararlarni qoplashga yo‘naltirilgan.
Eslatib o‘tamiz, 2021-yilda davlat va jamiyat ehtiyojlari uchun yer uchastkalarining olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha jamg‘armaga 150 milliard so‘m ajratilgandi. Deputat Rasul Kusherbayev mablag‘ning juda kam ekanini tanqid qilgandi.
Bundan tashqari, Bosh prokuratura “snos”lar tufayli 2020-yilda buzilgan mulklarning 55 foiziga kompensatsiya to‘lanmaganini ma’lum qilgandi. Toshkent shahar hokimi Jahongir Ortiqxo‘jayev 2021-yil oxirigacha “snos”lar bo‘yicha barcha qarzlarni to‘lashga va’da bergandi.
Izoh (0)