Ўзбекистонда 2022 йилда «снос»лар учун компенсацияга бюджетдан 500 миллиард сўм ажратилади. Бу ҳақда Молия вазирлигининг 2022 йил учун бюджетнома лойиҳасига таяниб, «Gazeta.uz» хабар қилди.
Қайд этилишича, 2022 йилда Давлат ва жамият эҳтиёжлари учун ер участкаларининг олиб қўйилиши муносабати билан жисмоний ва юридик шахсларга етказилган зарарларни қоплаш бўйича жамғармасига Вазирлар Маҳкамаси захира жамғармаси маблағларининг 15 фоизидан кам бўлмаган миқдорда, яъни республика бюджетидан 500 миллиард сўм маблағ ажратиш режалаштирилган.
Маълумот учун, 2021 йилда бу йўналишдаги харажатлар учун 273 миллиард сўм ажратилган. 2020 йилда эса 215,8 миллиард сўм «снос»дан кўрилган зарарларни қоплашга йўналтирилган.
Эслатиб ўтамиз, 2021 йилда давлат ва жамият эҳтиёжлари учун ер участкаларининг олиб қўйилиши муносабати билан жисмоний ва юридик шахсларга етказилган зарарларни қоплаш бўйича жамғармага 150 миллиард сўм ажратилганди. Депутат Расул Кушербаев маблағнинг жуда кам эканини танқид қилганди.
Бундан ташқари, Бош прокуратура «снос»лар туфайли 2020 йилда бузилган мулкларнинг 55 фоизига компенсация тўланмаганини маълум қилганди. Тошкент шаҳар ҳокими Жаҳонгир Ортиқхўжаев 2021 йил охиригача «снос»лар бўйича барча қарзларни тўлашга ваъда берганди.
Изоҳ (0)