Toshkent viloyatida o‘tkazilayotgan “Xavfsiz tun” tezkor profilaktik tadbiri doirasida YPX inspektori tomonidan 3 nafar qidiruvdagi shaxs aniqlandi. Bu haqda “Daryo”ga viloyat IIBB YHXB axborot xizmati xabar qildi.
2021-yilning 9-noyabr kuni Yangiyo‘l shahrida xizmat olib borayotgan YPX inspektori safdor M.Muratov qoidabuzarlik sodir etgan piyodani to‘xtatgan. Elektron tartibda ma’muriy bayonnoma rasmiylashtirish vaqtida, A.R. (1982-yilda tug‘ilgan) qidiruvda ekani, Jinoyat kodeksining 168-moddasi (firibgarlik) jinoyatni sodir etganlikda ayblanib, sud tomonidan qamoq ehtiyot chorasi belgilanishiga qaramasdan huquqni muhofaza qiluvchi organlardan qochib yurgani aniqlangan.
Shuningdek, 15-noyabr kuni Parkent tumanida xizmat olib borayotgan YPX inspektori safdor S.Yunusov piyoda B.S.ni qoidabuzarlik sodir etgani uchun to‘xtatib, elektron tartibda ma’muriy bayonnoma rasmiylashtirish vaqtida u ham qidiruvda ekanini aniqlagan. Parkent tumani IIB tomonidan olib borilgan surishtiruvga ko‘ra, Farg‘ona viloyatida yashovchi ushbu shaxs Jinoyat kodeksining 168-moddasi (firibgarlik) jinoyatini sodir etganlikda ayblanib, huquqni muhofaza qiluvchi organlardan qochib yurgan.
Yana bir holatda, 18-noyabr kuni YPX inspektori safdor S.Yunusov Parkent tumanida xizmat olib borayotgan vaqtida qoidabuzarlik sodir etgan piyodani to‘xtatgan.
Qoidabuzarlik yuzasidan elektron tartibda ma’muriy bayonnoma rasmiylashtirish vaqtida, mazkur fuqaro ham qidiruvda ekani aniqlangan. Surishtiruvlarga ko‘ra, Farg‘ona viloyatida yashovchi L.K. (1996-yilda tug‘ilgan) Jinoyat kodeksining 122-moddasida ko‘rsatilgan (voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash) bir necha jinoyatni sodir etib huquqni muhofaza qiluvchi organlardan qochib yurgani aniqlangan.
Ushlangan shaxslar hududiy IIBga olib borilgan.
Bundan avval O‘zbekistonda qidiruvda bo‘lgan “Hizb ut-Tahrir” yetakchisi Qirg‘izistonda ushlangani, Sankt-Peterburgda davlatlararo qidiruvda bo‘lgan o‘zbekistonlik ayol qo‘lga olingani hamda Toshkent viloyatida Qirg‘izistondan 1998-yilda o‘g‘irlab kelingan avtomobil aniqlangani haqida xabar berilgandi.
Izoh (0)