Навоий халқаро аэропортида рейси жадвалда бўлмаган 200 га яқин одам тўпланди

Навоий халқаро аэропортида одамлар тўплангани ҳақида хабар тарқалди. Ҳолат юзасидан Uzbekistan Airports расмий хабар берди.

Қайд этилишича, 2021 йилнинг 8 ноябрь куни тушдан кейин Россиянинг IFly авиакомпанияси томонидан Навоий–Москва ва Навоий–Санкт-Петербург йўналишлари бўйича парвоз қилиш ниятида йўловчилар Навоий халқаро аэропортига кела бошлагани. Бироқ бу рейслар жадвалда бўлмаган.

Йўловчиларнинг сўзларига кўра, улар авиачипталарни «Восток Бухоро» компаниясининг Самарқанд, Бухоро ва Урганч шаҳарларида жойлашган турли филиалларидан харид қилган. Маҳаллий вақт билан соат 18:00 га келиб, аэропортда 200 га яқин одам тўпланган.

Навоий аэропорти ходимлари чипталарни сотган компания билан боғланиб, йўловчиларга керакли маълумотларни етказишни ва вазиятни бартараф этишни талаб қилган. Компания вакиллари барча йўловчиларга чипта пуллари қайтарилишини маълум қилган. Айни дамда йўловчилар терминал биносини тарк этган.

Маълум қилинишича, Uzbekistan Airports’нинг авиачипталар савдосига ҳеч қандай алоқаси йўқ.

Рейси жадвалда йўқ одамларнинг аэропортга тўпланиш ҳолати 6 кун ичида учинчи бора такрорланди. Бундан аввал ҳолат 3 ноябрь куни Тошкент халқаро аэропортида ва 5 ноябрь куни Урганч аэропортида қайд этилганди.