Jizzax viloyatida 8—16-oktabr kunlari sodir bo‘lgan yo‘l-transport hodisalari oqibatida jami olti kishi halok bo‘ldi. Bu haqda IIVning “Yo‘l qoidasi” ko‘rsatuvida ma’lum qilindi.
Ma’lum qilinishicha, 8-oktabr kuni soat 22:00 larda viloyatning G‘allaorol tumani hududidan o‘tuvchi 4R-38 avtomobil yo‘lining 42-kilometrida Jizzax shahar “Zilol” mahallasida istiqomat qiluvchi fuqaro boshqaruvida bo‘lgan Nexia-2 G‘allaorol—Jizzax yo‘nalishida harakatlanib borayotib, e’tiborsizligi tufayli yo‘lning belgilanmagan joyidan kesib o‘tayotgan piyodani urib yuborgan.
Oqibatda 55 yoshli piyoda olgan tan jarohatlari sabab Respublika shoshilinch tez yordam ilmiy markazi Jizzax filialida vafot etgan.
Holat yuzasidan G‘allaorol tumani IIO FMB Tergov bo‘limida tomonidan tergov harakatlari olib borilmoqda.
Shuningdek, 14-oktabr kuni soat 15:45 larda Sharof Rashidov tumani hududidan o‘tuvchi 4R-35 Jizzax—Paxtakor—Do‘stlik—Gagarin avtomobil yo‘lining 17-kilometrida ham yo‘l-transport hodisasi yuz bergan. 1994-yilda tug‘ilgan haydovchi Damas avtomobilini boshqarib ketayotib, rul boshqaruvini yo‘qotgan va yo‘l chetida to‘xtab turgan Matiz’ning orqa chap tomoniga kelib urilgan. YTH natijasida Damas qarama-qarshi yo‘nalishda harakatlanib kelayotgan Nexia-2 bilan to‘qnashuv sodir etgan.
Avariya oqibatida Nexia avtomobil yo‘lning o‘ng tomoniga chiqib ketib, ag‘darilgan, Damas haydovchisi voqea joyida vafot etgan.
Bundan tashqari, 16-oktabr kuni soat 03:00 larda Sharof Rashidov tumani hududidan o‘tgan M39 Termiz—Toshkent avtomobil yo‘lining 988-kilometrida 33 yoshli surxondaryolik haydovchi Cobalt avtomobilini boshqarib kelayotib uxlab qolishi natijasida qarama-qarshi yo‘nalishdagi Chevrolet Optra’ga urilgan.
Avariya oqibatida Optra’ning ikki yo‘lovchisi, Cobalt haydovchisi va mashina ichida bo‘lgan to‘rt nafar yo‘lovchi turli tan jarohatlari bilan shifoxonaga yotqizilgan. Biroq Optra haydovchisi va mashina ichida bo‘lgan 41 yoshli yo‘lovchi voqea joyida vafot etgan.
Shu kunning o‘zida soat 19:05 larda Forish tumani “Do‘stlik” MFY hududidan o‘tgan 4R36 Jizzax—Forish—Qizilcha avtomobil yo‘lining 111-kilometrida navoiylik haydovchi Nexia-3 avtomobilini boshqarib ketayotib, rul boshqaruvini yo‘qotgan va yo‘lning chap tomoniga ag‘darilgan.
Oqibatda mashina ichida yo‘lovchi sifatida harakatlangan 2003 va 2001-yillarda tug‘ilgan yo‘lovchilar turli tan jarohatlari olib, voqea joyida vafot etgan.
Avvalroq Toshkentda Nexia qarama-qarshi yo‘nalishga chiqib ketib, Spark’ka urilishi oqibatida yo‘lovchi halok bo‘lgani, Qashqadaryoda harakatlanayotgan Nexia’ning chiqib ketgan g‘ildiragi boshqa bir haydovchining o‘limiga sababchi bo‘lgani, Samarqandda Nexia beton to‘siqqa urilib, yonib ketishi oqibatida ikki nafar yo‘lovchi voqea joyida vafot etgani to‘g‘risida xabar berilgandi.
Izoh (0)