Toyota kompaniyasi yangi yonilg‘i elementlari imkoniyatlari namoyish etilgan videorolik bilan bo‘lishdi. Marka mutaxassislari 1:10 masshtabda o‘yinchoq Toyota Mirai’ni haqiqiy avtomobil aniqligida yasagan. Biroq yapon muhandislariga vizual o‘xshashlik yetarli bo‘lmagan, shu sababli ular mitti nusxaga vodorodli yonilg‘i elementlaridagi dvigatelni ham o‘rnatishga qaror qilgan, deb xabar beradi Motor.
Toyota mutaxassislari noodatiy loyiha yuzasidan vodorodli yonilg‘i elementlarini ishlab chiqishga ixtisoslashgan Britaniyaning Bramble Energy texnologik kompaniyasiga murojaat qilgan. Hamkorlikdagi ish natijasida ekspertlar mitti dvigatelni yaratgan va uni radioboshqariluvchi model shassisiga o‘rnatishga muvaffaq bo‘lgan. O‘yinchoq Mirai vodorod uchun AA tipidagi oddiy batareyalarni yodga soluvchi ikkita bakka, bosma plata asosidagi yonilg‘i yacheykasi (Printed Circuit Board Fuel Cell) va tortuvchi batareyaga ega bo‘lgan.
Ixtirochilarning so‘zlariga ko‘ra, vodorodli yonilg‘i elementlaridan foydalanish mitti Toyota’dan foydalanish vaqtini oddiy batareyalar bilan taqqoslaganda ikki barobarga oshirish imkonini beradi. Kompaniya vakillari dvigatel va o‘yinchoq Mirai’ning maksimal tezligi bo‘yicha ma’lumotlarni oshkor etmagan bo‘lsa-da, modelning chiquvchi quvvati 20 vatt atrofida.
Radioboshqariluvchi mashinada vodorodli yacheykalardan foydalanish imkoniyati kompaniyaning yonilg‘i elementlaridan klassik avtomobil sohasidan tashqarida ham qo‘llay olishini namoyish etgan.
Oddiy Toyota Mirai 182 ot kuchiga ega elektromotor, yonilg‘i elementlaridagi elektrokimyoviy generator va har birida 5,6 kilogramm vodorod saqlanadigan uchta ballon bilan jizohlangan. Mirai bir marta yonilg‘i quyish orqali 860 kilometr yo‘l bosa oladi.
Avvalroq Toyota Mirai vodorodomobili yonilg‘i elementlarida harakatlanadigan elektromobillar o‘rtasida bir marta quvvatlanish orqali uzoq masofa bosib o‘tish bo‘yicha rekord o‘rnatgani to‘g‘risida xabar berilgandi.
Izoh (0)