“Vatanparvar” tashkilotida o‘qigan haydovchi YTH sodir etsa, uni o‘qitgan instruktor jazoga tortiladi. Bu haqda O‘zbekiston Respublikasi mudofaasiga ko‘maklashuvchi “Vatanparvar” tashkiloti rahbari Husan Botirov “Daryo” muxbiri Musulmonbek Ibrohimovga bergan intervyusida aytib o‘tdi.
— Suhbatlarimizning birida yo‘l-transport hodisasini sodir etgan haydovchi “Vatanparvar” tashkiloti tarkibidagi avtomaktablarda o‘qigan bo‘lsa, o‘sha haydovchini o‘qitgan yo‘riqchiga nisbatan chora ko‘riladi va kerak bo‘lsa, ishdan olishgacha boriladi, degan fikrni aytgan edingiz. Bu mehnat qonunchiligiga qanchalik to‘g‘ri keladi?
— O‘ylashimcha, agar mehnat qonunchiligiga tayanib bu masalaga yondashadigan bo‘lsak, zid bo‘lmaydi. Negaki, tashkilot aynan shu ish bilan shug‘ullanadi, tashkilotning faoliyati sifatini ko‘rsatib beradigan ish — malakali haydovchilarni tayyorlash. Malakasiz haydovchini tayyorlagan o‘qituvchi qayerda va kimga kerak? Men fikrimda qolaman. Faqat fikrimni to‘laroq bayon qilmoqchiman. Yo‘l-transport hodisalarining sababchisi hamisha ham haydovchi bo‘lmaydi, buni inkor eta olmaymiz. Diniy tomondan yondashsak, ba’zi bir hamyurtlarimiz “og‘aynilar, bu taqdirdan, Alloh peshonaga yozgani bo‘ladi”, deya munosabat bildiradi. Albatta, biz buni ham inkor etmaymiz. Faqat fikrim shundayki, qonun-qoidalarni bila turib, ularga amal qilmasdan, yo‘l-transport hodisasi kelib chiqishiga sababchi bo‘lgan haydovchi, agar “Vatanparvar” tashkilotida o‘qigan bo‘lsa, oqibatda inson o‘limi yoki mayib-majruh bo‘lib qolishiga shu haydovchi sababchi bo‘lsa, albatta, uni o‘qitgan, tayyorlagan o‘qituvchisi va avtomobil boshqaruv ustasidan so‘rov qilish mantiqan to‘g‘ri, deb o‘ylayman. YTH sodir etgan haydovchi ikki-uch yil avval o‘qigan bo‘lsa ham, unga javob berishi kerak.
— Bu tizimni qanday yo‘lga qo‘ymoqchisiz?
— Respublikadagi barcha yo‘l harakati xavfsizligi bo‘linmalari bilan ma’lumotlar almashinuv tizimini joriy etishni rejalashtiryapmiz. Agar YTH sabablari to‘g‘risida axborot olish imkoni yaratilsa, ishimiz yanada osonlashadi. Masalan, biror-bir aholi punktida yo‘l-transport hodisasi sodir bo‘ldi, shu YTH tahlili haqida avtomobil haydovchilarini tayyorlaydigan muassasalarga ma’lumot yuboriladi va u o‘sha avtomaktabda ko‘rib chiqiladi. Bunda tergov organi hodisa sodir etgan haydovchining mast holatda bo‘lgani, charchab uxlab qolgani yoki xasta bo‘lgani kabi sabablarini oydinlashtirib bersa, shunga qarab holatga o‘z munosabatimizni bildiramiz.
— Shu vaqtga qadar “Vatanparvar” tashkilotida o‘qigan haydovchi YTH sodir etib, uni o‘qitgan instruktorga biror chora ko‘rildimi?
— Internetda har qanday yo‘l-transport hodisasi haqidagi xabarni ko‘rganimda darrov tashkilot vakillari uchun yaratib qo‘ygan guruhimizga yuboraman. YTH sodir etilgan hududdagi mutasaddimiz darrov ichki ishlarga murojaat qilib, shu hodisaning sababchisi kim, haydovchi qayerda o‘qigan ekan, deb surishtiradi. Ochig‘ini aytaman, bugungi kungacha “Vatanparvar” tashkilotida o‘qib, yo‘l-transport hodisasining sababchisi bo‘lgan – o‘lim yoki og‘ir asoratlar bilan yakun topgan holatlar haqida ma’lumot hali bizga kelib tushgani yo‘q. Balki bordir, har qalay, hozircha qo‘limga unday ma’lumot olganim yo‘q.
Avvalroq Husan Botirov pulga sotilayotgan “prava”lar haqidagi savolga javob berar ekan, kimdir ishi, o‘qishi yoki boshqa sabablarga bog‘liq holda avtomaktabda o‘qimay “Mana, sizga o‘sha o‘qishga ketadigan mablag‘, imtihondan o‘tkazib bersangiz bo‘ldi”, deb murojaat qiladiganlar borligini ta’kidlab o‘tgan edi. Shuningdek, u har qanday holatda ham yo‘l-transport hodisalarining asosiy sababchisi haydovchi ekanligini ta’kidlagandi.
Izoh (0)