Shahzoda Uilyam hamda uning rafiqasi Kembrij gersoginyasi Keyt Earthshot Prize birinchi taqdirlash marosimiga yangi avtomobilda tashrif buyurdi. E’lon qilingan suratlardan ko‘rish mumkinki, atrof muhit himoyasi borasida ko‘rsatgan xizmatlari uchun topshiriladigan mukofot uchun ular shunga mos transport tanlagan — to‘liq elektr energiyasida harakatlanuvchi Audi RS e-tron GT. Buyuk Britaniyada uning narxi 110 ming funt (152 ming dollar) atrofida, deb xabar beradi Motor.
Audi RS e-tron GT — bu 2021-yilning fevralida taqdim etilgan to‘liq uzatmali elektrosedanning top versiyasi va ingliz-shotland markasining RS-versiyadagi birinchi “batareyali” avtomobili hisoblanadi. Model xuddi Porsche Taycan kabi J1 platformasi asosida yaratilgan va uning uzunligi qariyb 5 metrga yetadi. Ikkita motorli kuch uzatmasi 598 ot kuchini (qisqa muddatga 646 ot kuchini) taqdim etishga qodir va soatiga 100 kilometr tezlikka 3,3 soniyada erishadi. Maksimal tezligi soatiga 250 kilometrni tashkil etadi.
RS e-tron GT modelini yig‘ish R8, A6, A7 va A8 kabi gibridlar ishlab chiqariluvchi Böllinger Höfe zavodida yo‘lga qo‘yilgan. Daily Mail’ning yozishicha, oddiy britaniyaliklar bu kabi Audi’ni xarid qilish uchun sakkiz oylab navbatda turadi, ammo gersoglar oilasi uchun istisno qilingan bo‘lishi mumkin.
Marosimdagi suratlar Uilyam Kensington saroyiga elektrokarlar uchun quvvatlantirish stansiyasini o‘rnatgani aytilgan xabarlar tarqalganidan bir necha soat o‘tib paydo bo‘ldi: to‘rt asrli tarixga ega qarorgoh hududida bu kabi qurilma birinchi bor o‘rnatilgan. 800 voltli kuchlanishga ega doimiy tokli stansiyadan RS e-tron GT taxminan 25 daqiqa ichida quvvatlana oladi. 100 kilometr masofaga yetadigan elektr energiyasini esa besh daqiqada olishga qodir. To‘liq quvvatli batareya WLTP sikliga ko‘ra 472 kilometr yo‘l bosishni ta’minlaydi.
Mavzuga doir: Keyt Middlton va shahzoda Uilyam ko‘chishni rejalashtirmoqda: ular qirolichaga yaqin yashashni xohlaydi
Izoh (0)