Dunyo va o‘zbek sportiga oid 20-oktabr kunining eng muhim xabarlari dayjesti bilan tanishing.
O‘zbekiston
“Paxtakor” O‘zbekiston Kubogi yarim finaliga chiqdi
Futbol bo‘yicha O‘zbekiston Kubogining 1/4 finalidan o‘rin olgan dastlabki o‘yinda “Paxtakor” “Olimpik” bilan bahs olib borib, kichik hisobda g‘alaba qozondi.
Shu tariqa “sherlar” mamlakat Kubogi yarim finaliga yo‘l olgan ilk jamoaga aylandi. Mazkur bosqichning qolgan o‘yinlari 28—29-oktabr kunlari bo‘lib o‘tadi.
“Nasaf” OFK Kubogi finaliga yo‘l oldi
Qarshining “Nasaf” klubi OFK Kubogining yarim finalida Gonkongning “Li Man” jamoasini 3:2 hisobida mag‘lub etib, musobaqa finaliga yo‘l oldi.
Hal qiluvchi o‘yinda “Nasaf” “Al-Muharraq” (Bahrayn) va “Al-Kuvayt” (Kuvayt) juftligi g‘olibi bilan to‘qnash keladi. Mazkur bahs ham 20-oktabr kuni bo‘lib o‘tadi. Final uchrashuvi esa 5-noyabr kuni bo‘lib o‘tadi.
Alisher Usmonov nomzodi FIE rahbarligiga tavsiya etildi
2021-yilda Xalqaro qilichbozlik federatsiyasining (FIE) hisobot-saylov Kongressi tashkil etiladi. Unda tashkilot rahbariyatiga saylov o‘tkaziladi.
MOQ matbuot xizmatining yozishicha, Rossiya qilichbozlik federatsiyasi mazkur saylovga mamlakat nomidan FIEning amaldagi rahbari Alisher Usmonovning nomzodini ilgari surgan. Shu tariqa 27-noyabr kuni Shveysariyada o‘tkaziladigan FIE Kongressida Usmonov nomzodi ko‘rib chiqiladi.
Ma’lumot uchun, asli kelib chiqishi o‘zbekistonlik bo‘lgan Alisher Usmonov 2008-yildan beri ushbu xalqaro tashkilotni boshqarib kelmoqda. U FIEga 2012 va 2016-yillarda qayta saylangan.
Jahon
Zidan “Manchester Yunayted”ni boshqarishi mumkin
“Real” sobiq bosh murabbiyi Zinedin Zidan “Manchester Yunayted”ni boshqarishi mumkin, deb yozmoqda El Chiringuito TV.
Manbaga ko‘ra, Manchester klubi Krishtianu Ronalduning tavsiyasiga bo‘yicha fransiyalik mutaxassis bilan aloqaga chiqqan.
Avvalroq jamoaning ayni paytdagi bosh murabbiyi Ole-Gunnar Sulsher so‘nggi vaqtlardagi qoniqarsiz natijalar tufayli iste’foga chiqarilishi mumkinligi haqida xabarlar tarqalgandi.
Saudiyaliklar qo‘liga o‘tgan “Nyukasl” Stiv Bryusni iste’foga chiqardi
“Nyukasl” bosh murabbiyi Stiv Bryus o‘z lavozimini tark etdi. Klub o‘z bayonotida tomonlar o‘zaro kelishuvga binoan shartnomani bekor qilganini e’lon qildi.
Shuningdek, “qarg‘alar” yaqin vaqt ichida yangi murabbiy nomini e’lon qilishini ham ma’lum qildi.
60 yoshli Bryus “Nyukasl”da 2019-yildan buyon ishlab kelayotgandi. U klub Saudiya Arabistoni fondi tomonidan sotib olingach, jamoa boshqaruvida atigi bitta o‘yin o‘tkazdi.
Messi Chempionlar Ligasida Ronalduga yetib oldi
“PSJ” hujumchisi Lionel Messi Chempionlar Ligasi 3-turi doirasidagi “Leypsig”ga qarshi o‘yinda (3:2) dubl qayd etdi.
Nemis klubi (“Leypsig”) argentinalik hujumchining Chempionlar Ligasida gol urgan 37-jamoasi bo‘ldi.
Shu tariqa Messi ushbu ko‘rsatkich bo‘yicha “Manchester Yunayted” hujumchisi Krishtianu Ronalduga yetib oldi. Ronaldu ham YChL doirasida 37 ta jamoa darvozasini ishg‘ol qilgan.
Shuningdek, ushbu dubl tufayli 34 yoshli Messining 2021-yildagi gollari soni 40 taga yetdi. Messi faoliyatida 12-marta bir kalendar yilida 40 tadan ko‘proq gol urishni uddaladi.
Saloh “Liverpul” rekordini o‘rnatdi
“Liverpul” hujumchisi Muhammad Saloh Chempionlar Ligasi 3-turidan o‘rin olgan o‘yinda “Atletiko” darvozasiga ikkita gol urdi.
Shu tariqa misrlik futbolchi musobaqadagi gollar soni bo‘yicha klub rekordini o‘rnatdi — 31.
Bungacha eng yaxshi natija musobaqada 30 ta gol urgan Stiven Jerrardga tegishli edi.
“Liverpul” 21 ta o‘yindan beri yutqazmayapti
“Liverpul” Chempionlar Ligasi guruh bosqichi 3-tur uchrashuvida “Atletiko”ni mag‘lub etdi (3:2).
Yurgen Klopp shogirdlari shu tariqa barcha musobaqalardagi mag‘lubiyatsiz seriyasini 21 uchrashuvga yetkazib oldi — 15 g‘alaba, 6 durang.
“Qizillar” oxirgi marta 2021-yilning aprel oyida YChL 1/4 finalida “Real”ga mag‘lub bo‘lgandi (1:3).
“Yuventus” va Dibala yangi shartnoma borasida kelishib oldi
“Yuventus” hujumchi Paulo Dibala bilan yangi shartnoma imzolashga yaqin.
Tuttosport’ning xabar qilishicha, argentinalik futbolchi “keksa sinyora” bilan 2026-yilning yoziga qadar mo‘ljallangan bitim borasida kelishuvga erishgan. Dibalaning agenti muzokaralarning so‘nggi detallarini hal qilish uchun Turinga yetib borgan.
Yangi bitimga ko‘ra, Dibala yiliga 8,5 million yevro maosh oladi. Bundan tashqari, 1,5 million yevro miqdorida bonuslar ham ko‘zda tutilgan.
“PSJ” Mbappeni tekinga qo‘yib yubormoqchi emas
“PSJ” 2022-yilning yozida erkin agentga aylanadigan hujumchi Kilian Mbappe bilan yangi shartnoma imzolamoqchi.
Parijliklar 22 yoshli futbolchini klubda qolishga ko‘ndirmoqchi va unga klub loyihasida asosiy rolni kafolatlamoqchi.
Qayd etilishicha, “PSJ” Mbappega qisqa muddatli shartnoma taklif qiladi va bir yildan so‘ng unga boshqa klubga o‘tishiga qarshilik ko‘rsatmaslikni va’da beradi. Parijliklar shu yo‘l bilan Kilianni jamoada olib qolmoqchi. Boisi ular uni tekinga qo‘yib yuborishni istamaydi.
Eslatib o‘tamiz, avvalroq Mbappe qancha pul taklif qilinishidan qat’i nazar, 2022-yilning yozida “PSJ”ni tark etishga ahd qilgani va “Real”ga o‘tishi haqida xabar berilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)