OChL. Jaloliddin Masharipov asosiy tarkibda tushgan o‘yinda “An-Nassr” “Al-Hilol”ga yengilib, final yo‘llanmasidan quruq qoldi

Futbol bo‘yicha Osiyo Chempionlar Ligasining 1/2 finalida “An-Nassr” 19-oktabr, seshanba kuni “Al-Hilol” bilan bahs yuritdi.

Uchrashuvda hisob 17-daqiqada ochildi. Mussa Marega “Ah-Hilol”ning tezkor hujumini golga aylantirdi. Birinchi bo‘lim yakunlanishi arafasida “An-Nassr” bir kishi kam bo‘lib qoldi, Ali Alavjami qo‘pollik uchun maydondan chetlatildi.

Ikkinchi 45 daqiqalik avvalida Taliska boshi bilan gol urib, muvozanatni tiklashga muvaffaq bo‘lgandi. Biroq 75-daqiqaga kelib, Salim Al-Dovsari “Al-Hilol”ga g‘alaba keltirgan golga mualliflik qildi.

“An-Nassr” sharafini himoya qiladigan o‘zbekistonlik yarim himoyachi Jaloliddin Masharipov uchrashuvda 79-daqiqa harakat qildi.

Shu tariqa “An-Nassr” Osiyo Chempionlar Ligasining bitta o‘yindan iborat bo‘lgan yarim final bahsida “Al-Hilol”ga yengildi. “Al-Hilol” final o‘yinida “Ulsan Hyunday” va Pohang Stilers” juftligi g‘olibi bilan to‘qnash keladi.