Ўзбекистоннинг амалдаги президенти, ЎзЛиДеПдан президентликка номзод Шавкат Мирзиёев 16 октябрь куни Тошкент вилоятидаги сайловчилар билан учрашувда вилоятнинг қатор шаҳарларида «яшил майдонлар» барпо этилиш таклифини билдирди, деб хабар беради «Дарё» мухбири.
Шавкат Мирзиёевнинг таъкидлашича, Олмалиқ, Чирчиқ, Ангрен, Бекобод, Оҳангарон ва Янгийўл шаҳарлари ҳудуди кенгайтирилиб, ҳар бирида «Янги Ўзбекистон» уй-жой мавзелари, ижтимоий объектлар ва «яшил майдонлар» барпо этилади.
«Бугунги кунда Чирчиқ шаҳрининг ‘Ифтихор’ маҳалласида барча зарур қулайликлар ва ижтимоий инфратузилмага эга янги турар жой мавзеси бунёд этилиб, 2,5 минг хонадонли 39 та кўп қаватли уй қурилмоқда. Кейинги босқичда, бу ерда яна 3,5 минг оилага мўлжалланган, 56 та замонавий уйлар барпо этилади. Ушбу тажрибани вилоятнинг бошқа шаҳарларида ҳам давом эттирамиз», — дейди давлат раҳбари.
Шунингдек, Шавкат Мирзиёев пойтахтдан бу шаҳарларга 120 километр тезликда юрадиган замонавий электропоезд ҳаракати йўлга қўйилиши, бунинг учун 10 та электропоезд харид қилиниши ва уларда пойтахт билан ягона билет тизими жорий этилишини маълум қилган. Бундан ташқари, ушбу шаҳарлардаги 800 дан зиёд кўп қаватли уйларнинг марказлашган иссиқлик таъминотини яхшилашга, ярим триллион сўм ажратилади.
«Энг муҳими, вилоят туманларини ўзаро ва пойтахт билан боғлайдиган Жамоат транспортини ривожлантириш дастури қабул қилинади. Дастур доирасида 20 та янги йўналиш очилади, 120 дан зиёд янги бекат қурилади, 13 та автостанция барпо этилади.
Келгуси беш йилда Тошкент вилоятида 3,5 минг километр автомобиль йўллари ва 232 та катта-кичик кўприкларни қуриш-таъмирлаш ишлари бажарилиб, бунга 4 триллион сўм йўналтирамиз.
Жумладан, пойтахтдан Улуғбек шаҳарчаси орқали Чирчиққа олиб борадиган янги автомобиль йўли барпо этилади. Шунингдек, вилоят инфратузилмасини ривожлантириш жамғармасига қўшимча 100 миллион доллар ажратилади», — дейди Шавкат Мирзиёев.
Аввалроқ Шавкат Мирзиёев Қаршидаги Президент мактабига ташриф буюриб, ўқувчилар билан суҳбатлашгани, Баҳоуддин Нақшбанд мақбарасини зиёрат қилгани, Қоракўлдаги Халқаро математика мактабини бориб кўргани тўғрисида хабарлар берилганди.
Изоҳ (0)