O‘zbekistonda AQShning terrorizmga qarshi kurashish bo‘yicha qurolli kuchlarini joylashtirish imkoniyati kun tartibida yo‘q va muhokama qilinmayapti. Bu haqda O‘zbekiston TIV rahbari Abdulaziz Komilov MDH davlatlari tashqi ishlar vazirlari Kengashi yig‘ilishi doirasida jurnalistlarga ma’lum qildi, deb yozmoqda “Gazeta.uz”.
Foto: TIV matbuot xizmati
Avvalroq Politico nashri Amerika harbiy idorasi rejalaridan xabardor bo‘lgan AQSh Kongressidagi manbalariga tayanib, Pentagon rasmiylari shu oy O‘zbekistonda terrorizmga qarshi kurashish kuchlarini joylashtirish imkoniyatini muhokama qilishini e’lon qilgandi.
Nashr ma’lumotlariga ko‘ra, kun tartibidagi asosiy masala AQSh harbiylariga “Afg‘onistondagi mo‘ljallarni yaxshiroq kuzatib, zarba berishga yordam beruvchi gorizont orti” terrorizmga qarshi kurashish kuchlarini joylashtirish imkoniyati bo‘ladi.
O‘zbekiston Mudofaa vazirligining “Gazeta.uz”ga ma’lum qilishicha, vazirlik Pentagondan mamlakatga tashrif bo‘yicha hech qanday rasmiy murojaat olmagan.
May oyida The Wall Street Journal AQSh Afg‘onistondan olib chiqilayotgan qo‘shinlarini Markaziy Osiyoda yoki Yaqin Sharqda joylashtirish variantlarini ko‘rib chiqayotganini ma’lum qilgandi. Maqbul variantlar sifatida O‘zbekiston va Tojikiston keltirilgandi.
O‘zbekistonning 2018-yil yanvar oyida qabul qilingan Mudofaa doktrinasiga ko‘ra, mamlakatda xorijiy davlatlarning harbiy bazalari va obyektlarini joylashtirishga ruxsat berilmaydi.
