Farg‘ona viloyatining Quvasoy shahrida MIB xodimlarini haqorat qilib, o‘z chaqalog‘iga benzin sepib, yoqib yuborish bilan tahdid qilib, ularning o‘z xizmat vazifalarini bajarishni to‘xtatishga erishgan er-xotinga jinoyat ishi qo‘zg‘atildi. Bu haqda “Daryo”ga Bosh prokuratura axborot xizmati rahbari Hayot Shamsutdinov xabar berdi.
Ma’lum qilinishicha, 2021-yilning 9-sentabrida MIB Quvasoy shahar bo‘limi ish yurituvida qarzdor ayol Z.B.dan fuqarolik ishlari bo‘yicha Farg‘ona tumanlararo sudining 8-fevraldagi qaroriga asosan “Hamkorbank” Quvasoy filiali foydasiga 32,5 million so‘m qarzdorlikni undirish belgilangan bo‘lgan.
Ushbu ijro ishi bo‘yicha MIB, shahar FVB yong‘in-qutqaruv qismi xodimlari, tez yordam shifokorlari, shahar IIB xodimlari hamda mahalla raisi ishtirokida Z.B.ning uyiga ijro harakatlarini amalga oshirish uchun borganida 28 yoshli Z.B. va uning 34 yoshli turmush o‘rtog‘i A.B. majburiy ijro harakatlari amalga oshirilishiga faol qarshilik qilib, MIB xodimlarini turli so‘zlar bilan haqorat qilgan. Bundan tashqari, ularga hamda qo‘lidagi chaqalog‘i ustiga benzin sepib, yoqib yuborishini aytib, MIB xodimlarining o‘z xizmat vazifalarini bajarishni to‘xtatishiga erishgan.
Ushbu qarzdor shaxslarga nisbatan 12-oktabr kuni shahar prokuraturasi tomonidan Jinoyat kodeksining 219-moddasi 2-qismi (hokimiyat vakiliga qanday shaklda bo‘lmasin o‘zining xizmat vazifasini bajarishdan voz kechishga majbur qilish) va 140-moddasi 3-qismi “a” bandi (jabrlanuvchini o‘z xizmat yoki fuqarolik burchini bajarishi munosabati bilan bog‘liq holda haqorat qilish) bilan jinoyat ishi qo‘zg‘atilgan.
Eslatib o‘tamiz, 2021-yilning avgustida Qashqadaryoda fuqarolar MIB xodimlarining ustiga benzin sepib, yoqib yubormoqchi bo‘lgandi. 2020-yilning boshlarida Samarqandlik ayol MIB xodimini yoqib yuborishga uringandi. O‘sha yilning yanvarida Andijonda, oktabrida esa Namanganda MIB xodimlariga norozilik bildirib, o‘ziga o‘t qo‘ygan fuqaro vafot etgandi.
Izoh (0)