Qashqadaryo viloyatining ikkita tumanida maktabgacha ta’lim klasteri tashkil etiladi. Bu haqda O‘zbekistonning amaldagi prezidenti, O‘zLiDePdan prezidentlikka nomzod Shavkat Mirziyoyev 11-oktabr kuni qashqadaryolik saylovchilar bilan bo‘lib o‘tgan uchrashuvda aytdi, deya xabar bermoqda “Daryo” muxbiri.
“Viloyatda maktabgacha ta’lim bilan qamrab olish darajasi 62 foizga yetkaziladi. Buning uchun 40 ta davlat va 38 ta xususiy, mingta oilaviy bog‘cha tashkil etiladi.
Koson va Shahrisabz pedagogika kollejlari bazasida maktabgacha ta’lim klasteri faoliyati yo‘lga qo‘yiladi. Bunga Qarshi davlat universiteti va pedagogika instituti bosh-qosh bo‘ladi. Qashqadaryoning olis va tog‘li hududlardagi barcha farzandlarimiz maktabgacha ta’lim bilan qamrab olinadi.
Dehqonobod, Kasbi, Kitob, Mirishkor, Qamashi, Chiroqchi, Nishon, Yakkabog‘ va G‘uzorda bog‘cha to‘lovi miqdori 2 barobarga kamaytiriladi”, — dedi Prezident.
Qayd etilishicha, viloyatda maktabgacha ta’limni rivojlantirishga bir trillion so‘mdan ziyod mablag‘ yo‘naltiriladi.
“Qashqadaryoda 101 ta maktab 3 smenada ishlaydi, 380 ta maktabda sport zal yo‘q, 809 ta maktab toza ichimlik suvi, 169 ta maktab zamonaviy isitish tizimi bilan ta’minlanmagan.
Kelgusi besh yilda 22 ta yangi maktab quriladi, 400 tasi to‘liq ta’mirlanadi. Natijada 140 mingta qo‘shimcha o‘quvchi o‘rni yaratiladi. Viloyatdagi 10 ming o‘rta maxsus ma’lumotli muallimlarga oliygohlarda o‘qish uchun kvota ajratiladi”, — dedi Mirziyoyev.
Izoh (0)