Президент Шавкат Мирзиёев 7 октябрь куни Сирдарё вилоятига келиб, Sirdaryo Mega Luks қўшма корхонаси фаолияти билан танишди. Бу ҳақда давлат раҳбарининг матбуот хизмати хабар берди.
Маълум қилинишича, 2020 йили бу ерда полипропилендан катта сиғимли қоплар ишлаб чиқариш йўлга қўйилган. «Юмшоқ контейнер» деб аталувчи бу қоплар 500 килограммдан 5000 килограммгача юк кўтаради. Уларга ишлаб чиқариш, савдо, қишлоқ хўжалиги, логистика каби кўплаб соҳаларда талаб юқори. Sirdaryo Mega Luks йилига 132 миллион дона шундай маҳсулот тайёрлаш қувватига эга.
Еттита корпусдан иборат улкан корхона изчил ривожланиб бормоқда. 2021 йил май ойида икки қаватли плёнка тайёрлаш йўлга қўйилган. Яқин ойларда стреч плёнка ва спанбонд технологияси асосида нотўқима мато ишлаб чиқариш бошланади.
Ҳозирда корхонада 2 мингдан ортиқ киши иш билан таъминланган. Мазкур лойиҳалар тўлиқ қувватга чиққач, иш ўринлари 5 мингга етади. Бугунги кунда Россия, Исроил, Беларусь, Украина, Қозоғистон каби 14 та мамлакатга экспорт йўлга қўйилган. Янги лойиҳалар билан биргаликда экспорт ҳажми 215 миллион долларга етиши мўлжалланган.
Шавкат Мирзиёевга истиқболдаги лойиҳалар ҳақида ҳам маълумот берилган.
Унга кўра, келгуси беш йилда полимер маҳсулотлари ишлаб чиқариш бўйича технопарк ташкил этиб, умумий қиймати 350 миллион доллар бўлган саккизта лойиҳани амалга ошириш режалаштирилган. Бунинг учун 260 миллион доллар инвестиция жалб этилиб, Германия, Италия, Австрия технологияси ўрнатилади.
Президент лойиҳаларнинг иқтисодий самарадорлиги билан бирга ижтимоий жиҳатига ҳам алоҳида эътибор қаратиш зарурлигини таъкидлаган.
«Бу маҳсулотларнинг хом ашёси ўзимизда, она заминимизда. Бундан ақл билан фойдаланиб, нарх ва сифат мутаносиблиги таъминланса, маҳсулотларимиз рақобатбардош бўлади. Фақат иқтисодий эмас, иқтисодий-ижтимоий лойиҳалар қилиш керак. Тадбиркор ҳам даромад топсин, одамлар ҳам», — дейди Шавкат Мирзиёев.
Шунингдек, зарур маблағ йўналтириб, ишлаб чиқариш ҳажмини икки баробар ошириш, келгусида ишчилар учун уй-жойлар барпо этиш бўйича кўрсатмалар берилган.
Аввалроқ Шавкат Мирзиёев Андижондаги «Янги авлод» хусусий мактаби фаолияти билан танишгани тўғрисида хабар берилганди.
Изоҳ (0)