Gollivud yulduzi Klint Istvud va imidj huquqlariga egalik qiluvchi Garrapata kompaniyasi Litvadagi CBD ishlab chiqaruvchisining mahsulotida 91 yoshli aktyorning obrazidan noqonuniy foydalangani uchun Mediatonas UAB kompaniyasidan 6,1 million dollarlik da’voni yutib chiqdi, deb xabar beradi Esquire.
2020-yilning iyulida Istvud Los-Anjeles sudiga CBD ishlab chiqaruvchilari va sotuvchilariga nisbatan ikkita da’vo arizasini kiritgan edi. Ular o‘z mahsulotlarining reklamasida aktyorning mavjud bo‘lmagan intervyusidan foydalangan. Unda Istvud marixuana o‘simligi tarkibidagi psixotrop bo‘lmagan kannabidiol moddasidan foydalanishni ma’qullagani ko‘rsatilgan. Shuningdek, aktyor o‘z nomiga bog‘liq ushbu mahsulot sotilayotgan 10 ta internet-do‘konini ham sudga bergan.
2021-yilning fevralida Istvudning yuristlari o‘zining saytlarida aktyorning yolg‘on intervyusini e’lon qilgan Mediatonas UAB kompaniyasiga nisbatan o‘zgartirilgan da’vo arizasini sudga kiritgan. Sud qaroriga ko‘ra, Istvud 6,1 million dollardan tashqari, advokatlarining gonorari sifatida 95 ming dollarni ham qo‘lga kiritgan.
Shu bilan birga, sud Istvud va Garrapata’ning da’vosini to‘liq qanoatlantirmagan. Chunki da’voda ular kompaniyani tuhmatda ham ayblagan. Sudyaning so‘zlariga ko‘ra, reklamada foydalanilgan til “bir qarashda tuhmatga o‘xshamaydi”.
Izoh (0)