Italiyada hafta boshida ob-havo keskin yomonlashib, kuchli yomg‘ir, momaqaldiroq va qattiq shamol boshlandi. Mamlakatning Fuqarolik mudofaa xizmati qaroriga binoan, kelgusi kunlar uchun uchta shimoliy viloyat — Liguriya, Lombardiya va Pyemontning bir qator tumanlarida meteorologik xavfning “qizil” (eng yomon) darajasi e’lon qilindi.
4-oktabr kuni Liguriyaning Savona provinsiyasiga, shuningdek, Genuya yaqiniga rekord darajadagi yog‘ingarchilik (taxminan, 500 mm) tushdi, buning oqibatida kichik daryolar qirg‘oqlaridan toshib ketib, bir necha aholi punktlarini suv bosdi. Ayrim tumanlarda temiryo‘l aloqalari vaqtinchalik to‘xtatildi. Mahalliy hokimiyat ko‘plab maktablar va bolalar bog‘chalarini, jamoat bog‘lari va qabristonlarni yopdi.
Italiya Harbiy havo kuchlari meteorologik xizmati xodimi podpolkovnik Guido Guidi 5-oktabr kuni RaiNews24 telekanaliga bergan intervyusida aytishicha, mamlakatning shimoliy viloyatlaridagi vaziyat keyingi 24 soat ichida normal holatga qaytishi kerak, ammo bu Apenninda ob-havo yaxshilanadi, degani emas.
“Bu yoz tugaganidan keyin yomon ob-havoning ilk yirik to‘lqini. U butun hafta davomida mamlakatning markaziy va janubiy hududlarida sezilib turadi”, — dedi taniqli meteorolog.
4-oktabr oqshomida yomon ob-havo Rimga yetib kelgan, kuchli momaqaldiroq va qattiq shamol oqibatida katta-katta daraxtlar qulab tushgan va ba’zi ko‘chalarni suv bosgan. Politsiya va o‘t o‘chirish xizmati xodimlari xavotirga tushgan fuqarolarning chaqiruvlariga binoan voqea joyiga, taxminan, yuz marta borishga majbur bo‘ldi. Noqulay ob-havo hodisalari hozirda Latsio ma’muriy viloyatining bir qancha tumanlarida, shuningdek, Abrutsso, Kampaniya va Sitsiliyada kuzatilmoqda.
Izoh (0)