MMA olamida bir qancha mashhur aka-uka va opa-singil sportchilar mavjud. Ular haqida qiziqarli ma’lumotlar taqdim etiladi.
Aka-uka Yemelyanenkolar
MMA tarixidagi eng yaxshi duetlardan biri Fyodor va Aleksandr Yemelyanenko. Juda ko‘p ekspertlar Fyodorni hamon aralash jang san’ati tarixidagi eng yaxshi jangchi deb hisoblaydi. 2001-yildan to 2009-yilgacha ketma-ket 27 ta g‘alabani qo‘lga kiritgan. O‘sha vaqtlardagi Pride ligasi yetakchisi edi. Antonio Nogeyra, Garri Gurij, Kevin Rendlman, Mirko Krokop, Andrey Orlovskiy va ko‘plab kuchli jangchilarni mag‘lub etgan.
XXI asrning ikkinchi o‘n yilligi “so‘nggi Imperator” uchun omadli kechmadi. Fyodor bir necha bor mag‘lubiyatga uchradi. Hozirda uning “Fedor Team” jamoasi Bellator musobaqasida yorqin janglar namoyish etmoqda.
Aleksandr Yemelyanenko esa akasi singari muvaffaqiyatli faoliyat olib bormadi. Sashaning jiddiy sovrinlari deyarli yo‘q. U oxirgi marta 2020-yil iyul oyida oktagonga chiqqan. O‘sha jangda u Magomed Ismoilovga mag‘lub bo‘lgandi.
Yemelyanenkolar dueti MMA tarixidagi eng kuchlilardan biri bo‘lib qolaveradi.
Aka-uka Diaslar
Nik va Neyt Diaslar — UFC’dagi mashhur aka-ukalardan biri. Ikkalasi ham o‘z vaqtida jahonning eng kuchli sportchilari bilan jang qilgan. Nik Dias Strikeforce ligasidagi davrida faoliyatining cho‘qqisiga erishgan, Nik UFC’ga o‘tganidan so‘ng yarim o‘rta vazn toifasida kamarni himoya qilgan. Deyna Uayt qanoti ostida to‘rtta jang o‘tkazgan va ularning barchasi mashhur yakkakurashchilarga qarshi bo‘lgan. Avvaliga, Nik sobiq jahon chempioni Bi Jey Pen ustidan g‘alaba qozondi, keyin esa Karlos Konditga mag‘lub bo‘ldi. So‘ngra afsonaviy Jorj Sen-Pyer bilan jangga chiqqan. Kanadalik sportchi bilan Dias munosib jang olib bordi, ammo Jorjni yengish nasib etmadi.
2021-yil 25-sentabr kuni Nik Dias Robbi Louler bilan oktagonga chiqdi. Amerikalik jangchi Dias ustidan g‘alabani qo‘lga kiritdi.
Neyt esa UFC’da akasidan ko‘ra ko‘proq muvaffaqiyatga erishgan. Konor Makgregor bilan jang Neytga shuhrat olib keldi. Irlandiyalik sportchi bilan revansh jangidagi mag‘lubiyat esa ko‘plab muhokamalarga sabab bo‘ldi. Shundan so‘ng Dias 3 yil mobaynida oktagonga chiqmadi. Lekin 2020-yilda ikkita jang o‘tkazdi. Entoni Pettis ustidan g‘alaba qozondi va Xorxe Masvidalga yengildi. 2021-yil 12-iyunda Leon Edvards bilan jangga chiqdi va unga ham mag‘lub bo‘ldi.
Aka-uka Freyrelar
Patrisiu va Patrike Freyre, ko‘proq “Pitbul” laqabi bilan mashhur bo‘lgan aka-ukalar Bellator’ning mashhur jangchilaridan biri bo‘lgan. Patrisiu Freyre promoushnda 23 ta jang o‘tkazgan va ularning 19 tasida g‘alaba qozongan. Freyre ikki vazn toifasi: yengil va yarim yengil vazn toifasida chempion hisoblanadi.
Ukasi Patrike esa 2011-yilda Bellator’da jang qila boshlagan. Maykl Chendler (ikki marta) va Eddi Alvares kabi mashhurlar bilan jang o‘tkazgan. Lekin yuqori cho‘qqiga chiqa olmagan. 2019-yilda Yaponiyaning RIZIN musobaqasiga o‘tib ketgan. U yerda Patrik finalgacha qiynalmasdan yetib borgan. Ammo hal qiluvchi jangda ozarbayjonlik Tofik Musayevga yengilgan. Braziliyalik sportchi 2021-yilda Bellator’ga qaytdi va Piter Kuilliga qarshi jang qildi. Patrike ushbu jangda nokautga uchradi.
Aka-uka Pettislar
Bu sportchilarni ortiqcha ta’riflash shart emas. Entoni “shoutaym-zarba”si tufayli UFC’ning afsonasiga aylangan. Katta Pettis UFC’da ajoyib faoliyat olib borgan. 2011-yilning oxirida ligada faoliyatini boshlagan Pettis 2013-yilda yengil vazn toifasida chempionga aylangan. Lekin uni ko‘p vaqt ushlab tura olmagan. Shunga qaramasdan Pettis liganing eng yorqin jangchilaridan biri bo‘lib qoldi. 2020-yilda UFC’da uchta jang o‘tkazdi va ularning ikkitasida g‘alaba qozondi. Yuqori notada UFC’ni tark etgan Entoni PFL’ga o‘tdi. PFL esa uning uchun omadi kelmadi. Ikkita jangda ikkita mag‘lubiyat.
Serxio Pettis UFC’da 14 ta jang o‘tkazgan va 9 tasida g‘alabaga erishgan. 2019-yilda Tayson Nem ustidan qozonilgan g‘alabadan so‘ng UFC’ni tark etdi. 2020-yildan buyon Bellator’da faoliyatini davom ettirib kelmoqda. 2021-yilning may oyida Xuan Archuletani mag‘lub etdi va chempionlikni qo‘lga kiritdi.
Opa-singil Shevchenkolar
Qirg‘izistonlik opa-singillar oxirgi yillarda eng yaxshi sportchi maqomiga loyiq faoliyat olib bormoqda. Valentina Shevchenko o‘z vazn toifasida munosib yetakchilik qilyapti. 2018-yildan buyon 8 ta jang o‘tkazib, barchasida g‘alaba qozondi. Valentina chempionlik kamarini olti marta himoya qilgan. Valentina UFC tarixidagi eng yaxshi sportchi ayollardan biri.
Antonina esa kikboks va muay-tayda sezilarli natijalar qayd etgan. UFC’dagi faoliyati esa 2018-yilda boshlangan. Katta Shevchenko UFC’da muvaffaqiyatga erishadimi-yo‘qmi, buni vaqt ko‘rsatadi.
So‘nggi vaqtlarda MMA’da faoliyatini yaqinda boshlagan va boshlamoqchi bo‘lgan aka-ukalar talaygina topiladi. UFC afsonasi Habib Nurmagomedovning amakivachchalari Umar va Usmon Nurmagomedov eng nufuzli promoushenlarda bir nechta jang qilishga ulgurdi. Zabit Magomedsharipovning ukasi Hasan ham MMA’ga kirib kelmoqda. Shuningdek, Kit Li akasi Kevin Lining muvaffaqiyatini davom ettirishga urinadi.
Izoh (0)