MMA оламида бир қанча машҳур ака-ука ва опа-сингил спортчилар мавжуд. Улар ҳақида қизиқарли маълумотлар тақдим этилади.
Ака-ука Емельяненколар
MMA тарихидаги энг яхши дуэтлардан бири Фёдор ва Александр Емельяненко. Жуда кўп экспертлар Фёдорни ҳамон аралаш жанг санъати тарихидаги энг яхши жангчи деб ҳисоблайди. 2001 йилдан то 2009 йилгача кетма-кет 27 та ғалабани қўлга киритган. Ўша вақтлардаги Pride лигаси етакчиси эди. Антонио Ногейра, Гарри Гуриж, Кевин Рендлман, Мирко Крокоп, Андрей Орловский ва кўплаб кучли жангчиларни мағлуб этган.
XXI асрнинг иккинчи ўн йиллиги «сўнгги Император» учун омадли кечмади. Фёдор бир неча бор мағлубиятга учради. Ҳозирда унинг «Fedor Теаm» жамоаси Bellator мусобақасида ёрқин жанглар намойиш этмоқда.
Александр Емельяненко эса акаси сингари муваффақиятли фаолият олиб бормади. Сашанинг жиддий совринлари деярли йўқ. У охирги марта 2020 йил июль ойида октагонга чиққан. Ўша жангда у Магомед Исмоиловга мағлуб бўлганди.
Емельяненколар дуэти MMA тарихидаги энг кучлилардан бири бўлиб қолаверади.
Ака-ука Диаслар
Ник ва Нейт Диаслар — UFC’даги машҳур ака-укалардан бири. Иккаласи ҳам ўз вақтида жаҳоннинг энг кучли спортчилари билан жанг қилган. Ник Диас Strikeforce лигасидаги даврида фаолиятининг чўққисига эришган, Ник UFC’га ўтганидан сўнг ярим ўрта вазн тоифасида камарни ҳимоя қилган. Дэйна Уайт қаноти остида тўртта жанг ўтказган ва уларнинг барчаси машҳур яккакурашчиларга қарши бўлган. Аввалига Ник собиқ жаҳон чемпиони Би Жей Пен устидан ғалаба қозонди, кейин эса Карлос Кондитга мағлуб бўлди. Сўнгра афсонавий Жорж Сен-Пьер билан жангга чиққан. Канадалик спортчи билан Диас муносиб жанг олиб борди, аммо Жоржни енгиш насиб этмади.
2021 йил 25 сентябрь куни Ник Диас Робби Лоулер билан октагонга чиқди. Америкалик жангчи Диас устидан ғалабани қўлга киритди.
Нейт эса UFC’да акасидан кўра кўпроқ муваффақиятга эришган. Конор Макгрегор билан жанг Нейтга шуҳрат олиб келди. Ирландиялик спортчи билан реванш жангидаги мағлубият эса кўплаб муҳокамаларга сабаб бўлди. Шундан сўнг Диас 3 йил мобайнида октагонга чиқмади. Лекин 2020 йилда иккита жанг ўтказди. Энтони Петтис устидан ғалаба қозонди ва Хорхе Масвидалга енгилди. 2021 йил 12 июнда Леон Эдвардс билан жангга чиқди ва унга ҳам мағлуб бўлди.
Ака-ука Фрейрелар
Патрисиу ва Патрике Фрейре кўпроқ «Питбул» лақаби билан машҳур бўлган ака-укалар Bellator’нинг машҳур жангчиларидан бири бўлган. Патрисиу Фрейре промоушнда 23 та жанг ўтказган ва уларнинг 19 тасида ғалаба қозонган. Фрейре икки вазн тоифаси: енгил ва ярим енгил вазн тоифасида чемпион ҳисобланади.
Укаси Патрике эса 2011 йилда Bellator’да жанг қила бошлаган. Майкл Чендлер (икки марта) ва Эдди Альварес каби машҳурлар билан жанг ўтказган. Лекин юқори чўққига чиқа олмаган. 2019 йилда Япониянинг RIZIN мусобақасига ўтиб кетган. У ерда Патрик финалгача қийналмасдан етиб борган. Аммо ҳал қилувчи жангда озарбайжонлик Тофик Мусаевга енгилган. Бразилиялик спортчи 2021 йилда Bellator’га қайтди ва Питер Куиллига қарши жанг қилди. Патрике ушбу жангда нокаутга учради.
Ака-ука Петтислар
Бу спортчиларни ортиқча таърифлаш шарт эмас. Энтони «шоутайм-зарба»си туфайли UFC’нинг афсонасига айланган. Катта Петтис UFC’да ажойиб фаолият олиб борган. 2011 йилнинг охирида лигада фаолиятини бошлаган Петтис 2013 йилда енгил вазн тоифасида чемпионга айланган. Лекин уни кўп вақт ушлаб тура олмаган. Шунга қарамасдан Петтис лиганинг энг ёрқин жангчиларидан бири бўлиб қолди. 2020 йилда UFC’да учта жанг ўтказди ва уларнинг иккитасида ғалаба қозонди. Юқори нотада UFC’ни тарк этган Энтони PFL’га ўтди. PFL эса унинг учун омади келмади. Иккита жангда иккита мағлубият.
Серхио Петтис UFC’да 14 та жанг ўтказган ва 9 тасида ғалабага эришган. 2019 йилда Тайсон Нем устидан қозонилган ғалабадан сўнг UFC’ни тарк этди. 2020 йилдан буён Bellator’да фаолиятини давом эттириб келмоқда. 2021 йилнинг май ойида Хуан Арчулетани мағлуб этди ва чемпионликни қўлга киритди.
Опа-сингил Шевченколар
Қирғизистонлик опа-сингиллар охирги йилларда энг яхши спортчи мақомига лойиқ фаолият олиб бормоқда. Валентина Шевченко ўз вазн тоифасида муносиб етакчилик қиляпти. 2018 йилдан буён 8 та жанг ўтказиб, барчасида ғалаба қозонди. Валентина чемпионлик камарини олти марта ҳимоя қилган. Валентина UFC тарихидаги энг яхши спортчи аёллардан бири.
Антонина эса кикбокс ва муай-тайда сезиларли натижалар қайд этган. UFC’даги фаолияти эса 2018 йилда бошланган. Катта Шевченко UFC’да муваффақиятга эришадими-йўқми, буни вақт кўрсатади.
Сўнгги вақтларда MMA’да фаолиятини яқинда бошлаган ва бошламоқчи бўлган ака-укалар талайгина топилади. UFC афсонаси Ҳабиб Нурмагомедовнинг амакиваччалари Умар ва Усмон Нурмагомедов энг нуфузли промоушeнларда бир нечта жанг қилишга улгурди. Забит Магомедшариповнинг укаси Ҳасан ҳам MMA’га кириб келмоқда. Шунингдек, Кит Ли акаси Кевин Лининг муваффақиятини давом эттиришга уринади.
Изоҳ (0)