Chilonzor tumanida “Milliy” stadioni oldidagi avtoturargohda voyaga yetmagan qizlar o‘rtasida janjal sodir bo‘lgani to‘g‘risida xabar berilgandi. Yunusobod tuman hokimligining ma’lum qilinishicha, holat yuzasidan qiz va uning onasi bilan tushuntirish ishlari olib borilgan.
Ijtimoiy tarmoqlarda voyaga yetmagan qizlarning janjali dahanaki mushtlashuvga aylanib ketgani tasvirlangan video tarqaldi. Videodan ko‘rish mumkinki, 17 yoshli Sh.Ya. og‘zaki tortishuv oqibatida yuzaga kelgan janjalda tanishi R.B.ni urgan.
Toshkent shahar IIBB holat bo‘yicha Chilonzor tumani IIO FMB tomonidan tekshiruv o‘tkazilayotganini bildirdi.
Yunusobod tuman hokimligi matbuot xizmatining yozishicha, hokimlik qoshidagi Voyaga yetmaganlar komissiyasiga Sh.Ya. onasi bilan birga chaqirtirilgan. Yuz bergan hodisa batafsil o‘rganilgan va fuqaro Sh.Ya.ning onasiga nisbatan Ma’muriy javobgarlik to‘g‘risidagi kodeksning 47-moddasiga (bolalarni tarbiyalash va ularga ta’lim berish borasidagi majburiyatlarni bajarmaslik) ko‘ra chora ko‘rilishi aytilgan. Mazkur moddada nazarda tutilgan huquqbuzarlik uchun BHMning 1 baravaridan 5 baravarigacha (1,35 million so‘mgacha) jarima belgilanishi mumkin.
Avvalroq internetda Urganchda bir guruh ayollarning o‘zaro janjallashayotgani aks etgan video tarqalgan edi.
Izoh (0)