Чилонзор туманида «Миллий» стадиони олдидаги автотураргоҳда вояга етмаган қизлар ўртасида жанжал содир бўлгани тўғрисида хабар берилганди. Юнусобод туман ҳокимлигининг маълум қилинишича, ҳолат юзасидан қиз ва унинг онаси билан тушунтириш ишлари олиб борилган.
Ижтимоий тармоқларда вояга етмаган қизларнинг жанжали даҳанаки муштлашувга айланиб кетгани тасвирланган видео тарқалди. Видеодан кўриш мумкинки, 17 ёшли Ш.Я. оғзаки тортишув оқибатида юзага келган жанжалда таниши Р.Б.ни урган.
Тошкент шаҳар ИИББ ҳолат бўйича Чилонзор тумани ИИО ФМБ томонидан текширув ўтказилаётганини билдирди.
Юнусобод туман ҳокимлиги матбуот хизматининг ёзишича, ҳокимлик қошидаги Вояга етмаганлар комиссиясига Ш.Я. онаси билан бирга чақиртирилган. Юз берган ҳодиса батафсил ўрганилган ва фуқаро Ш.Я.нинг онасига нисбатан Маъмурий жавобгарлик тўғрисидаги кодекснинг 47-моддасига (болаларни тарбиялаш ва уларга таълим бериш борасидаги мажбуриятларни бажармаслик) кўра чора кўрилиши айтилган. Мазкур моддада назарда тутилган ҳуқуқбузарлик учун БҲМнинг 1 бараваридан 5 бараваригача (1,35 миллион сўмгача) жарима белгиланиши мумкин.
Аввалроқ интернетда Урганчда бир гуруҳ аёлларнинг ўзаро жанжаллашаётгани акс этган видео тарқалган эди.
Изоҳ (0)