Toshkent viloyati Bo‘stonliq tumanida Mudofaa vazirligi harbiy xizmatchilari xavfli hujumga uchragan taksi haydovchisining hayotini saqlab qoldi. Bu haqda vazirlik matbuot xizmati xabar berdi.
Ma’lum qilinishicha, 1-oktabr kuni soat 16:50 lar atrofida Mudofaa vazirligining Chorbog‘ qo‘rg‘onida joylashgan harbiy qismning bir guruh harbiy xizmatchilari o‘z xizmat vazifalarini bajarish uchun ketayotib, Toshkent—Sijjak yo‘nalishidagi avtomobil yo‘lining yoqasida ikki nafar fuqaro o‘zaro janjallashayotganiga guvoh bo‘lgan.
Harbiy xizmatchilar zudlik bilan mashinani to‘xtatib, ularga yaqinlashganida fuqarolardan biri jarohatlangan, ikkinchisining qo‘lida o‘tkir tig‘li pichoq borligini ko‘rgan. Ular har ikkala fuqaroni bir-biridan uzoqlashtirib qo‘lga olgan va jarohatlangan fuqaroni Chorbog‘ tez tibbiy yordam bo‘limiga, ikkinchisini esa ichki ishlar bo‘limiga olib borgan.
Dastlabki so‘rov natijasida olingan ma’lumotlarga ko‘ra, Toshkent shahrida tug‘ilgan 26 yoshli S.M. 32 yoshli A.P. bilan o‘zini Chorbog‘ qo‘rg‘onida joylashgan “Bochka” nomli oshxonaga olib borib qo‘yishi uchun 200 ming so‘m pul evaziga kelishgan.
Manzilga yaqin kelganda fuqaro S.M. Toshkent—Sijjak yo‘lining xilvat joyida mashinani to‘xtatishni va shu yerga yana bir hamrohi kelishilgan pulni olib kelib berishini aytgan. Biroz vaqt o‘tgach, o‘zaro suhbatlashish jarayonida mashinaning orqa o‘rindig‘ida o‘tirgan S.M. fuqaro A.P.ga to‘satdan pichoq bilan hujum qilib, gavdasining orqa qismi va bel sohasiga tan jarohati yetkazgan. Haydovchi o‘zini himoya qilish maqsadida mashinadan tushib qochayotgan vaqtida harbiy xizmatchilar kelib qolgan.
Ta’kidlanishicha, holat yuzasidan ichki ishlar bo‘limi xodimlari tomonidan dastlabki surishtiruv-tergov harakatlari olib borilmoqda.
Avvalroq Toshkentda harbiy xizmatchi Anhor kanalida cho‘kayotgan ona-bolani qutqarib qolgani, Buxoroda IIB xodimlari avtomobili bilan suvda oqib ketayotgan fuqaroni qutqargani to‘g‘risida xabar berilgandi.
Izoh (0)