Xiaomi kompaniyasi quritish tizimiga ega mitti kir yuvish mashinasi — Mijia Mini Washing Machine’ni taqdim etdi, deb xabar beradi Lifehacker.
Qurilmadan oddiy kir yuvish mashinasi o‘rnida yoki zudlik bilan bitta buyumni yuvish kerak bo‘lib qolganida foydalanish mumkin: buning uchun tezda yuvish rejimi ham mavjud (24 daqiqa).
Yuqori qismi ochiladigan qurilmaga maksimal 1 kilogrammgacha kiyim ketadi. Yuvish rejimlari 16 ta bo‘lib, tezkor variantdan tashqari ehtiyot bo‘lib yuvish, shuningdek, allergiyaga qarshi (Selsiy bo‘yicha 60 darajada) va sterillovchi (Selsiy bo‘yicha 90 darajada) rejimlari bor. Mi Home mobil dasturi orqali masofadan turib rejimlarni almashtirish va yuvishni ishga tushirish mumkin.
Yangi kir yuvish mashinasi 1099 yuanga (170 dollar) baholangan bo‘lib, uni hozirda Xitoyda xarid qilish mumkin. Bu kabi texnika odatda xalqaro bozorga chiqarilmaydi, ammo vaqt o‘tishi bilan AliExpress’da paydo bo‘ladi.
Xiaomi fonarga ega, bitta tugmani bosish orqali qayta yig‘iladigan, yomg‘ir va quyoshdan himoyalovchi soyabonni ixtiro qilgani, Xiaomi geymerlar uchun musiqiy lampalar jamlanmasini taqdim etgani to‘g‘risida xabar berilgandi.
Izoh (0)