Yurak kasalliklari bevaqt o‘limga olib kelishi bo‘yicha yetakchi ekani hech kimga sir emas. Ushbu xavfning oldini olish uchun esa unga xos simptomlar haqida ma’lumotga ega bo‘lib, o‘z vaqtida chora ko‘rish kerak.
Soch to‘kilishi
Erkak va ayollarda sochning erta to‘kilishi, darhaqiqat, arteriyalarning bekilib qolishi va tromb shakllanishi xavfi bilan bog‘liq ekaniga ishonish qiyin. Ammo 73 ming nafar erkak ishtirok etgan tadqiqotda soch to‘kilishi va yurak ishemik kasalliklari o‘rtasida aloqadorlik borligi isbotlangan. 4000 nafar ayol qatnashgan yana bir boshqa tadqiqotda esa ularda ham bunga moyillik borligi aniqlangan. Sizda ham bu holat kuzatilayotgan bo‘lsa, doimiy ravishda kardiologga borib tekshirtirib turish kerak.
Quloqdagi o‘zgarish
Yurakning ishemik kasalligidan dalolat beruvchi yana bir simptom quloqning tashqi tomonida ajin yoki burma hosil bo‘lishi sanaladi. Ishemik kasallikka xos mazkur yashirin simptom so‘nggi 10 yil davomida o‘tkazilgan ko‘plab tadqiqotlarda tilga olingan. Shifokorlarning taxmin qilishicha, hamma gap qon aylanishining yomonlashishi bilan bog‘liq bo‘lishi mumkin. Arteriyadagi berkilishlar sabab qon yaxshi aylanmaydi, organizm esa bu vaqtda uncha muhim bo‘lmaganlaridan tejash hisobiga eng muhim a’zolarni kislorod bilan ta’minlashga urinadi.
Oyoqlardagi og‘riq
Ushbu simptomga, ayniqsa, chekuvchilar ko‘proq e’tibor berishi kerak: qon aylanishining yomonlashishi sabab oyoq-qo‘llardagi qon tomirlarda muammolar kuzatiladi. Bunday vaqtda boldirda to‘satdan og‘riq paydo bo‘lishi va bu yiqilishga ham olib kelishi mumkin. Agar bu sizga begona bo‘lmasa, zudlik bilan shifokorga murojaat qiling, shuningdek, ko‘p sayr qilish, sabzavotlar iste’mol qilishni unutmang.
Bo‘yin va jag‘ sohasidagi og‘riqlar
Ayollardagi yurak xurujining dastlabki alomatlari, asosan, ko‘krak qafasi emas, aynan bo‘yin yoki jag‘dagi og‘riq bilan namoyon bo‘ladi. Buni yurakdagi muammoga aloqasi borligini bilmagani sabab ham ayollar shifokorga o‘z vaqtida murojaat qilmaydi. Sizda bu kabi og‘riq kuzatilsa, befarq bo‘lmasdan darhol kardiologga murojaat qiling.
Beldagi og‘riq
Beldagi og‘riq odatiy bo‘lmagan, ammo yetarlicha keng tarqalgan alomatlardan hisoblanadi. Gap shundaki, qon aylanishining yaxshi emasligi tufayli umurtqa pog‘onalar orasidagi disk zaiflashishi hamda bosim ortib, og‘riq his qilishga olib kelishi mumkin. Sizda shunday og‘riq kuzatilayotgan bo‘lsa, kardiologga murojaat qilishni va kerakli tekshiruvlardan o‘tishni unutmang.
Izoh (0)