Юрак касалликлари бевақт ўлимга олиб келиши бўйича етакчи экани ҳеч кимга сир эмас. Ушбу хавфнинг олдини олиш учун эса унга хос симптомлар ҳақида маълумотга эга бўлиб, ўз вақтида чора кўриш керак.
Соч тўкилиши
Эркак ва аёлларда сочнинг эрта тўкилиши, дарҳақиқат, артерияларнинг бекилиб қолиши ва тромб шаклланиши хавфи билан боғлиқ эканига ишониш қийин. Аммо 73 минг нафар эркак иштирок этган тадқиқотда соч тўкилиши ва юрак ишемик касалликлари ўртасида алоқадорлик борлиги исботланган. 4000 нафар аёл қатнашган яна бир бошқа тадқиқотда эса уларда ҳам бунга мойиллик борлиги аниқланган. Сизда ҳам бу ҳолат кузатилаётган бўлса, доимий равишда кардиологга бориб текширтириб туриш керак.
Қулоқдаги ўзгариш
Юракнинг ишемик касаллигидан далолат берувчи яна бир симптом қулоқнинг ташқи томонида ажин ёки бурма ҳосил бўлиши саналади. Ишемик касалликка хос мазкур яширин симптом сўнгги 10 йил давомида ўтказилган кўплаб тадқиқотларда тилга олинган. Шифокорларнинг тахмин қилишича, ҳамма гап қон айланишининг ёмонлашиши билан боғлиқ бўлиши мумкин. Артериядаги беркилишлар сабаб қон яхши айланмайди, организм эса бу вақтда унча муҳим бўлмаганларидан тежаш ҳисобига энг муҳим аъзоларни кислород билан таъминлашга уринади.
Оёқлардаги оғриқ
Ушбу симптомга, айниқса, чекувчилар кўпроқ эътибор бериши керак: қон айланишининг ёмонлашиши сабаб оёқ-қўллардаги қон томирларда муаммолар кузатилади. Бундай вақтда болдирда тўсатдан оғриқ пайдо бўлиши ва бу йиқилишга ҳам олиб келиши мумкин. Агар бу сизга бегона бўлмаса, зудлик билан шифокорга мурожаат қилинг, шунингдек, кўп сайр қилиш, сабзавотлар истеъмол қилишни унутманг.
Бўйин ва жағ соҳасидаги оғриқлар
Аёллардаги юрак хуружининг дастлабки аломатлари, асосан, кўкрак қафаси эмас, айнан бўйин ёки жағдаги оғриқ билан намоён бўлади. Буни юракдаги муаммога алоқаси борлигини билмагани сабаб ҳам аёллар шифокорга ўз вақтида мурожаат қилмайди. Сизда бу каби оғриқ кузатилса, бефарқ бўлмасдан дарҳол кардиологга мурожаат қилинг.
Белдаги оғриқ
Белдаги оғриқ одатий бўлмаган, аммо етарлича кенг тарқалган аломатлардан ҳисобланади. Гап шундаки, қон айланишининг яхши эмаслиги туфайли умуртқа поғоналар орасидаги диск заифлашиши ҳамда босим ортиб, оғриқ ҳис қилишга олиб келиши мумкин. Сизда шундай оғриқ кузатилаётган бўлса, кардиологга мурожаат қилишни ва керакли текширувлардан ўтишни унутманг.
Изоҳ (0)