Sirdaryo viloyatining Yangiyer shahrida uch kishi salomatlik yo‘lakchasini qurish uchun 13 ta daraxtni qo‘porayotgani aniqlandi. Bu haqda Ekologiya va atrof-muhitni muhofaza qilish davlat qo‘mitasi xabar berdi.
Qayd etilishicha, 17-sentabr kuni viloyat Ekologiya va atrof-muhitni muhofaza qilish sohasidagi nazorat bo‘yicha Yangiyer shahar va Xovos tuman inspeksiyalari inspektorlari hamda shahar IIB PPX va JTSB xodimlari hamkorligida tungi reyd tadbirlari o‘tkazilgan. Shu kuni kech soat 22:52 lar atrofida “Shodlik” MFY hududida “Suv ombor qurilish” xususiy korxonasi ish yurituvchisi O.S.ning buyrug‘i bilan fuqarolar N.X., S.T. va A.G‘. salomatlik yo‘lakchasi qurilishi sababli ekskavator bilan 12 dona shumtol va 1 dona tut daraxtini qo‘porayotgani aniqlangan.
Aniqlangan holat yuzasidan fuqarolarga nisbatan Ma’muriy javobgarlik to‘g‘risidagi kodeksning 79-moddasi 1-qismi (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) bilan ma’muriy bayonnoma rasmiylashtirilib, 6 million 750 ming so‘m jarima to‘lash va tabiatga yetkazilgan 125 million 820 ming so‘m zararni qoplash belgilangan.
Eslatib o‘tamiz, Shavkat Mirziyoyevning 3-fevraldagi farmoni bilan O‘zbekistonda daraxt va butalarni kesishga o‘rnatilgan moratoriy muddati 2021-yil oxirigacha uzaytirilgan.
Mavzuga doir:
- Surxondaryoda tuman hokimining yer ajratish bo‘yicha qarori bilan tut daraxtlarini kesib tashlab, 31 mln so‘m zarar keltirgan shaxs 1,3 mln so‘m jarimaga tortildi
- “Amirsoy” kurort zonasida 700 tup atrofida qimmatbaho daraxtlar kesib tashlangani bo‘yicha jinoyat ishi qo‘zg‘atildi
- Rasul Kusherbayev: “Denovda 109 tup daraxtning noqonuniy kesilishi yuzasidan nega jinoyat ishi qo‘zg‘atilmadi?”
Izoh (0)