Bandlik va mehnat munosabatlari vazirligi ijtimoiy tarmoqlarda maktab o‘qituvchilari majburiy mehnatga jalb etilgani borasidagi tarqalgan xabarlar bo‘yicha ma’lumot berdi.
Ijtimoiy tarmoqda “O‘qituvchilarimiz baraka topsin. Dars soatini kamaytirishdan qo‘rqib, darsdan keyin ishlab, salqinda dam olishmoqda. Bu ham yetmagandek direktorning baqirishini eshitishga ham majbur. Bu voqeaga batafsil qaytamiz” mazmunida chiqqan xabar bo‘yicha Qashqadaryo viloyati Bandlik bosh boshqarmasi davlat mehnat inspeksiyasi tomonidan o‘rganish o‘tkazilgan.
O‘rganish davomida Qarshi shahar 31-umumiy o‘rta ta’lim maktabi direktori tomonidan maktab o‘qituvchilari obodonlashtirish ishlariga jalb etgani aniqlangan.
Mazkur holat yuzasidan maktab direktoriga nisbatan Ma’muriy javobgarlik to‘g‘risidagi kodeksning 51-moddasiga asosan bazaviy hisoblash miqdorining 80 barobari (21,6 million so‘m) miqdorida ma’muriy jarima qo‘llanilgan.
Avvalroq Sirdaryoda o‘qituvchilarni majburiy mehnatga jalb qilgan maktab direktori 12 mln so‘m jarimaga tortilgani, Qashqadaryoda o‘qituvchilarni majburiy mehnatga jalb qilgan direktor ishdan olingani haqida xabar berilgan edi.
Izoh (0)