Namangan xalqaro aeroportida zaharli moddalar sizishi bilan bog‘liq favqulodda vaziyatlarning oldini olishga qaratilgan maxsus-taktik o‘quv mashqi o‘tkazildi. Bu haqda “Daryo” muxbiri Azizbek Abduvaliyev xabar bermoqda.
O‘quv mashqi mavzusiga ko‘ra, aeroport hududiga kuchli ta’sir etuvchi ammiak olib kelinib, maxsus konteynerga joylashtirish vaqtida konteyner nosozligi sababli mazkur modda tashqariga sizib chiqadi hamda bir guruh ishchi-xodimlar zaharlanadi.
Bu haqda ma’lumot olingach, aeroport fuqaro muhofazasi tuzilmalari Namangan viloyat Favqulodda vaziyatlar boshqarmasi qutqaruvchilari bilan hamkorlikda zudlik bilan ishga kirishdi. Maxsus texnikalar jalb qilinib, zararlangan hudud to‘liq qamrab olindi.
Aeroport yong‘inga qarshi kurash guruhining transportlari yordamida suvli to‘siqlar hosil qilindi. Konteynerdan zaharli modda sizib chiqishiga chek qo‘yish uchun maxsus bandaj qo‘llandi va xavf bartaraf etildi. Ushbu hududdan olib chiqilgan jabrlanuvchilar maxsus zararsizlantirish punktidan o‘tkazildi.
Ularga dala sharoitidagi tibbiyot punktlarida birinchi tibbiy yordam ko‘rsatildi. Jabrlanuvchilar tez tibbiy yordam transportida shifoxonalarga yuborildi. Aeroport hududidagi binoning ikkinchi qavatida qolib ketgan ishchi-xodimlar evakuatsiya qilindi va xavfsiz joyga olib chiqildi.
Yakuniy bosqichda favqulodda vaziyatlar sharoitida aeroport hududidagi panagohga ishchi-xodimlarni joylashtirish va ular uchun shart-sharoitlar yaratish bo‘yicha tushunchalar berildi.
Namangan viloyati FVB matbuot xizmati rahbari Qahramon Sattarovning ma’lum qilishicha, aeroportda o‘tkazilgan maxsus-taktik o‘quv mashqiga 80 nafardan ortiq ishtirokchi hamda 18 ta maxsus texnika jalb qilindi. Mashq davomida aniqlangan kamchiliklar mutasaddi va mas’ullar tomonidan batafsil tahlil qilindi.
Izoh (0)