Onasining qistovi bilan yangi tug‘ilgan chaqalog‘ini 8 million so‘mga sotishga uringan 35 yoshli buxorolik ayolga sud hukmi o‘qildi. Bu haqda “Daryo”ga G‘ijduvon tumani sudi raisi Bobur Umarov ma’lum qildi.
Ma’lum bo‘lishicha, fuqaro F.J. 2019-yildan beri turmush o‘rtog‘i A.A. bilan oilaviy kelishmovchilik sabab alohida yashab kelgan. Shunga qaramasdan, ikki nafar voyaga yetmagan farzandini yolg‘iz tarbiyalab kelayotgan ayol homilador bo‘lib qolgan. Ayolning 58 yoshli onasi bolani oldirish qizining sog‘lig‘i uchun xavfli ekanini inobatga olib, qizining bolani dunyoga keltirishiga qarshilik ko‘rsatmagan.F.J. 2021-yilning 8-aprel kuni farzandini G‘ijduvon tumani tibbiyot birlashmasi tug‘ruq bo‘limida dunyoga keltirgach, onasi qizining eri bilan yashamasligini, bolaning otasi kimligi ham noma’lum bo‘lgani uchun chaqaloqni qishloqqa olib borolmasligini, qo‘ni-qo‘shnilar va qarindoshlar oldida sharmanda bo‘lishi mumkinligini aytgan.
“Shu sabab ona qizidan farzandini sotishni talab qilgan. F.J. esa bolasining sotib yuborilishiga qarshi bo‘lib, uning talabini rad etgan. Shunga qaramasdan, ona qiziga o‘z hukmini o‘tkazib, chaqaloqni sotib yuborishga undagan. Oradan bir necha kun o‘tgach, ona va qiz 12 yildan beri farzandsizlikdan qiynalib, bola sotib olish istagida yurgan er-xotin ‘mijoz’ni topishgan. Ayolning onasi bola sotib olishga shay fuqarolar N.R. hamda Sh.N.larga qizining fuqarolik pasporti va nikoh xatini berib, yangi tug‘ilgan chaqaloqqa zudlik bilan guvohnoma tayyorlashni buyurgan. Va chaqaloqni berib yuborish evaziga ulardan 8 million so‘m pul talab qilgan. Avvaliga yangi tug‘ilgan chaqalog‘ining sotib yuborilishiga qarshilik ko‘rsatgan F.J. keyinchalik shuncha miqdorda manfaat ko‘rishini ko‘zlab, uni sotishga rozi bo‘lgan. N.R. hamda Sh.N.lar tug‘ruqxonadan bolaga ruxsat berilgan kun chaqaloqning tug‘ilganligi haqidagi guvohnomasini tayyorlab kelishgan va bolani sotib olish uchun G‘ijduvon tumani markaziy shifoxonasi tug‘ruq bo‘limi hovlisida F.J.bilan uchrashgan. F.J. 8 million so‘m miqdoridagi pullarni ulardan olib, chaqaloqni bergan vaqtda viloyat IIB va G‘ijduvon tumani IIB xodimlari tomonidan qo‘lga olingan”, — deydi sudya Bobur Umarov.
Sud hay’ati odam savdosi bilan shug‘ullangan ona va qizining xatti-harakatiga baho berib, ularni Jinoyat kodeksining 135-moddasi (odam savdosi) bilan aybli deb topgan. Biroq F.J.ning voyaga yetmagan ikki nafar farzandi borligi, onasining qistovi bilan bola savdosiga qo‘l urgani va bundan chin ko‘ngildan pushaymonligi inobatga olinib, unga nisbatan Jinoyat kodeksining 72-moddasi (shartli hukm qilish) qo‘llangan. Ushbu moddaga ko‘ra, aybdor uchun tayinlangan ozodlikdan mahrum etish jazosi shartli hisoblanib, 3 yil sinov muddati belgilanadi.
Shuningdek, ayolning onasi Sh.R.ning ham o‘z aybiga iqrorligi, qishloqda sharmanda bo‘lmaslik uchun qilayotgan xatti-harakatini boshqara olmagani inobatga olinib, unga nisbatan Jinoyat kodeksining 57-moddasi (aybga iqrorlik to‘g‘risida kelishuv tuzilgan jinoyatlar bo‘yicha jazo tayinlash) qo‘llangan va jazodan ozod qilingan.
Mavzuga doir:
Izoh (0)