Andijon viloyati hokimi Shuhrat Abdurahmonov Tokio-2020 Paralimpiya o‘yinlari oltin medali sovrindori Bobur Omonovga Andijon shahridan 2-xonali xonadon sovg‘a qildi. Bu haqda “Daryo” muxbiri Umidjon Mamarasulov xabar bermoqda.
Ta’kidlanishicha, 13-sentabr kuni Andijon shahridagi Bobur maydonida Tokioda bo‘lib o‘tgan yozgi Paralimpiya o‘yinlari g‘olibi va ishtirokchilarini kutib olish va taqdirlash marosimi o‘tkazilgan.
Unda so‘zga chiqqan Shuhrat Abdurahmonov viloyat sha’nini munosib himoya qilgan, yadro uloqtirish bo‘yicha Paralimpiada rekordini yangilab, oltin medalni qo‘lga kiritgan Bobur Omonovga Andijon shahrida yaqinda foydalanishga topshirilgan 16 qavatli uydan 2-xonali xonadon kalitini, chempionning murabbiyi Mavlon Haydarovga 50 million so‘m pul mukofotini topshirgan. Shuningdek, Paralimpiya ishtirokchilari Firdavs Musabekov, Muzaffar Tursunxo‘jayev, Muslima Odilova, Bekjon Chevarov, Temur G‘iyosovlarga o‘z minnatdorligini bildirib, esdalik sovg‘alari bilan taqdirlagan.
Tadbirda ta’kidlanishicha, Bobur Omonovga “O‘zbekiston iftixori”, murabbiy Mavlon Haydarovga esa “O‘zbekiston Respublikasida xizmat ko‘rsatgan sport ustozi” faxriy unvoni berilgan, Paralimpiya ishtirokchisi Temurbek G‘iyosov esa “Shuhrat” medali bilan taqdirlangan.
Eslatib o‘tamiz, avvalroq Tokio—2020 Paralimpiadasi sovrindorlariga Tahoe, Traverse, Trailblazer avtomobillari va Toshkent shahridan uylar topshirilgani haqida xabar berilgandi.
Izoh (0)