Jons Hopkins universiteti ma’lumotlariga ko‘ra, dunyoda koronavirus bilan kasallanganlar soni 225 296 439 kishiga yetdi, shularning 4 640 022 nafari vafot etgan. Shuningdek, butun dunyo bo‘yicha qo‘llanilgan vaksinalar dozasi 5,7 milliarddan oshdi.

Kasallanganlar soni bo‘yicha AQSh (41,2 million), Hindiston (33,2 million), Braziliya (21 million), Buyuk Britaniya (7,2 million) va Rossiya (7 million) eng oldinda bormoqda.

Yaponiyada COVID-19 tufayli favqulodda vaziyat rejimi 30-sentabrgacha uzaytirildi

Foto: EPA

COVID-19 pandemiyasiga qarshi kurash va global vaksinatsiya masalalariga bag‘ishlangan xalqaro sammit 22-sentabrga belgilandi.

“Sammit chog‘ida prezident Bayden davlat, hukumat va xalqaro tashkilotlar rahbarlarini, biznes, xayriya va nohukumat tashkilotlar yetakchilarini COVID-19 pandemiyasiga nuqta qo‘yish majburiyatini o‘z zimmalariga olish uchun kuchlarni birlashtirishga chaqiradi”, — deyiladi sammit taklifnomasida.

Sammit virtual formatda bo‘lib o‘tishi kutilmoqda.

Ma’lumotlarga ko‘ra, rasmiy shaxslar rejalashtirishicha, sammitda qatnashadigan mamlakatlar COVAX dasturini vaksinalarni tarqatishning asosiy vositasiga aylantirish majburiyatini olishi kerak. Shu bilan birga, Bayden jamoasining maqsadi boyroq mamlakatlarni o‘zlaridagi har qanday ortiqcha vaksinalarni sotishga emas, balki xayriya qilishga ko‘ndirishdan iborat.

Sammitda qatnashish uchun taklif etilganlarning aniq ro‘yxati hozircha ma’lum emas, ammo manbalarga ko‘ra, ular orasida Xitoy bor (Pekin COVID-19 ning kelib chiqishi bo‘yicha xalqaro tadqiqotlarda to‘liq hamkorlik qilmayotganiga qaramasdan).

Buyuk Britaniya hukumati mamlakat bosh shifokorlarining 12—15 yoshli sog‘lom bolalarni Pfizer/BioNTech vaksinasining bitta dozasi bilan emlash haqidagi tavsiyasini qo‘llab-quvvatladi.

Hozircha vaksinatsiya Angliya hukumati tomonidan ma’qullangan bo‘lib, u yerda kelasi haftadan boshlanadi. Shotlandiya, Uels va Shimoliy Irlandiyada ham bu haqda e’lon qilinishi kutilmoqda.

Avvalroq Britaniya hududlarining bosh shifokorlari 12 yoshdan 15 yoshgacha bo‘lgan bolalarni emlash maktablarda COVID-19 yuqishi ehtimolini pasaytirish imkonini berishini ma’lum qilgandi. Vaksinatsiya o‘quv muassasalarida amalga oshirilishi kutilmoqda, hozircha faqat bitta doza bilan emlash haqida gap bormoqda. Vaksinatsiya uchun ota-onalar roziligi kerak, shu bilan birga, “so‘nggi qarorni bolaning o‘zi beradi”.

AQShda koronavirus tufayli yana restoranlar yopilmoqda. Xususan, McDonald’s va Chick-fil-A fastfud restoranlari tarmoqlari o‘z muassasalarining to‘liq ochilish muddatini kechiktirdi. Iyul oyida McDonald’s tarmoqning barcha kafelari sentabr boshiga kelib, faqat uyga olib ketish va yetkazib berish rejimida emas, balki to‘la-to‘kis ishlashini taxmin qilgandi, ammo kafelarning bir qismi hamon shunday rejimda ishlamoqda.

Delta shtamm tarqalishi tufayli amerikaliklar yana restoranlarga borishni kamaytirdi: so‘rov natijalariga ko‘ra, so‘nggi bir hafta Ichida amerikaliklarning 9 foizi restoranlarga belgilangan tushlik va kechki taomlarni bekor qilgan.