7-avgust, shanba kuni AQShda koronavirus bilan kasallanish bo‘yicha 100 mingdan ortiq holat aniqlandi, bu iyun boshidagi ko‘rsatkichdan 10 marta ko‘proq demakdir. Bu haqda Kasalliklar nazorati va profilaktikasi markazi (CDC) ma’lumotlari darak bermoqda, deb yozadi “RBK”.
Sog‘liqni saqlash tizimi vakillari xavotir bildirishicha, agar aholining katta qismi emlanmasa, kasalxonaga yotqizilganlar va o‘limlar soni o‘sishda davom etadi. Aniqlik kiritilishicha, kasallikning yangidan avj olishi delta shtammi bilan bog‘liq.
“Bizning modellarimiz ko‘rsatishicha, agar biz odamlarni emlamasak, yanvar boshida kuzatilgan avj nuqtadagi kabi kuniga bir necha yuz minggacha kasallanish holatlariga duch kelishimiz mumkin”, — dedi CDC rahbari Roshel Valenski.
Eng murakkab vaziyat mamlakat janubida qayd etilmoqda, u yerda vaksinatsiyaning AQShdagi eng past ko‘rsatkichlari kuzatilmoqda. “Biz bemorlar sonining shunchalik keskin o‘sishiga guvoh bo‘lyapmizki, bunday vaziyatni avval ko‘rmaganmiz”, — dedi Floridadagi Memorial German kasalxonasi bosh shifokori Mark Napp.
Bir kun avval AQShda aholining yarmi koronavirusga qarshi to‘liq emlangani xabar berilgan edi. Vaksinaning birinchi dozasini aholining 58,4 foizi (193,7 million kishi) olgan bo‘lsa, 50 foizi (165,9 million kishi) ikkita doza bilan emlangan.
Avvalroq AQSh hukumati koronavirusga qarshi to‘liq emlangan xorijlik fuqarolargagina mamlakatga kirish uchun ruxsat berishni rejalashtirayotgani xabar berilgan edi.