Toshkentda 18 yoshli yigit ijaraga olingan xonadonda narkolaboratoriya tashkil qilgani aniqlandi. Bu haqda “Toshkent” telekanalida ma’lum qilindi.
Unda aytilishicha, 8-sentabr kuni Toshkent shahar IIBBga Mirobod tumanidagi xonadonlardan birida sintetik narkotik vositalari tayyorlanayotgani haqida xabar kelib tushgan. “Qoradori-2021” tadbiri doirasida o‘tkazilgan tezkor tadbirda aytilgan manzilga borilganda haqiqatda ham ushbu xonadonda “Tezlik” nomli sintetik modda ishlab chiqarish yo‘lga qo‘yilgani aniqlangan.
Yigit xonadonni 2 oy oldin 400 dollarga ijaraga olgan. Giyohvand modda uchun eritma Qozog‘istondan keltirilgan. U eritmalarni qaynatib, sovitgan, keyin ularni turli idishlarga solgan. Shundan so‘ng tayyor tovar garov sifatida Toshkentning turli joylariga yashirilgan. U yerdan noma’lum shaxslar uni olib ketgan. Shunday qilib yigit 2 oy davomida, taxminan, 7 litr xomashyodan sintetik narkotik vositalari tayyorlagan. Ushbu jarayonning barcha a’zolari faqat Telegram orqali muloqot qilgan.
Yigitning so‘zlariga ko‘ra, uning ota-onasi o‘ziga to‘q odamlar, u hech qachon biror narsaga muhtoj bo‘lmagan. Ammo o‘zi pul topishni, iloji bo‘lsa, bu tez va ko‘p bo‘lishini xohlagan. U qilgan ishidan pushaymonligini, agar bu ishni to‘xtata olganida allaqachon to‘xtatgan bo‘lishini bildirgan.
Xabarda aytilishicha, endi u qilgan ishi uchun qonun oldida javob beradi
Izoh (0)