Бухорода аёлининг пулини ўмариб, уни кўнгилхушлик учун сарфлаб юборган эркакка нисбатан жиноий иш очилди. Бу ҳақда «Марказий студия» информацион дастури хабар қилди.
Бухоро вилояти Олот туманида ичкуёв сифатида яшовчи эркак аёли ишлаб топган 1 миллион 200 минг сўм пулни ўғирлаб, уларни кўчадаги бегона аёлларга сарфлаб юборади. Эркак буни яшириш мақсадида уйини тартибсиз ҳолга келтириб, ўзини ўзи калтаклайди. Сўнгра ҳовлисига ётиб олиб, қўшниларни чақиради.
Аёлига эса уйга ўғри тушгани ва ўзини калтаклаб, пулларни ўмариб кетганини айтади. Аёли бўлган воқеа юзасидан ИИБга мурожаат қилади.
Суриштирув натижасида эркак ёлғон гапиргани аниқланади.
«Уйдагилардан сўроқсиз пул олгандим. Уни қандай айтишни билмадим-да, қўрққанимдан шундай ҳолат бўлганини айтдим. Пушаймонман», – дейди эркак.
Мазкур ҳолат юзасидан Жиноят кодексининг 237-моддаси 2-қисми «а», «б» ва «г» (сунъий далилларини вужудга келтирган ҳолда, ғаразгўйлик ниятларида ва оғир ёки ўта оғир жиноят содир этишда айблаб ёлғон хабар бериш) бандлари билан жиноят иши қўзғатилиб, тергов ҳаракатлари олиб борилмоқда.
Бу модданинг ушбу бандлари билан айбдор деб топилган шахс 5 йилдан 8 йилгача озодликдан маҳрум этилиши мумкин.
Мавзуга доир:
- Тошкентда раҳбарининг 6 млн сўм пулини тотализаторга тикиб, ютқазиб қўйган йигит ўзини пичоқлади
- Тошкентда турмуш ўртоғини ёлғон билан уйига қайтармоқчи бўлган аёлга жиноят иши қўзғатилди
- Қашқадарёда талончилар 32,5 млн сўм ва 700 долларни тортиб олганини айтган фуқаро ёлғон кўрсатма бергани аниқланди
Изоҳ (0)