Asli o‘zbekistonlik bo‘lgan rossiyalik aktrisa Ravshana Kurkova shaxsiy hayotiga aloqador muhim sirni ochiqladi, deb yozadi “Ok.Magazine.ru”.
Ma’lum bo‘lishicha, 40 yoshli aktrisaning uzoq vaqtdan beri ommadan yashirib kelayotgan o‘g‘li bor. U Instagram’dagi sahifasiga bolakay bilan tushgan bir qator fotosuratlarni joylashtirdi. Bolaning ismi Gaspar Amaryan.
“Yuragim o‘g‘lim bilan ulg‘ayyapti. Albatta, bu hayotimdagi eng yaxshi yil — eng muhim, eng asosiy, uzoq kutilgan va eng baxtli yil”, — deya rasmlar tagiga izoh yozgan Ravshan Kurkova.
OAV ma’lumotlariga ko‘ra, bola surrogat ona yordamida dunyoga kelgan. 2020-yilning oktabr oyida Telegram’dagi “Antiglyanets” kanali aktrisa va uning sevgilisi — Rocky Road boks klubi egasi Sergey Amaryanning ota-ona bo‘lgani haqida ma’lumot bergandi. “Mayizli bulochka — Gaspar Sergeyeyich bilan tanishing”, deb yozgan baxtiyor ota chaqaloq bilan tushgan surati ostidagi izohida.
Eslatib o‘tamiz, aktrisa 1980-yil Toshkentda aktyorlar oilasida dunyoga kelgan. Bolaligidan aktrisa bo‘lishni istagan Ravshana 12 yoshida “Qirqquloqlar siri” filmida debyut rolini ijro qilgan.
90-yillarning so‘ngida Kurkova Moskvaga ko‘chib ketgan va Moskva pedagogika universitetining filologiya fakultetiga qabul qilingan. Talabalik davrida rejissorlik kurslariga qatnab, aktyorlik mahoratini o‘rgangan.
Izoh (0)