Россиялик актриса Равшана Куркова она бўлганини маълум қилди ва илк бор ўғлининг суратини кўрсатди

Асли ўзбекистонлик бўлган россиялик актриса Равшана Куркова шахсий ҳаётига алоқадор муҳим сирни очиқлади, деб ёзади «Ok.Magazine.ru».

Маълум бўлишича, 40 ёшли актрисанинг узоқ вақтдан бери оммадан яшириб келаётган ўғли бор. У Instagram’даги саҳифасига болакай билан тушган бир қатор фотосуратларни жойлаштирди. Боланинг исми Гаспар Амарян.

«Юрагим ўғлим билан улғайяпти. Албатта, бу ҳаётимдаги энг яхши йил — энг муҳим, энг асосий, узоқ кутилган ва энг бахтли йил», — дея расмлар тагига изоҳ ёзган Равшан Куркова.

ОАВ маълумотларига кўра, бола суррогат она ёрдамида дунёга келган. 2020 йилнинг октябрь ойида Telegram’даги «Антиглянец» канали актриса ва унинг севгилиси — Rocky Road бокс клуби эгаси Сергей Амаряннинг ота-она бўлгани ҳақида маълумот берганди. «Майизли булочка — Гаспар Сергеейич билан танишинг», деб ёзган бахтиёр ота чақалоқ билан тушган сурати остидаги изоҳида.

Эслатиб ўтамиз, актриса 1980 йил Тошкентда актёрлар оиласида дунёга келган. Болалигидан актриса бўлишни истаган Равшана 12 ёшида «Қирққулоқлар сири» фильмида дебют ролини ижро қилган.

90 йилларнинг сўнгида Куркова Москвага кўчиб кетган ва Москва педагогика университетининг филология факультетига қабул қилинган. Талабалик даврида режиссёрлик курсларига қатнаб, актёрлик маҳоратини ўрганган.