O‘zbekiston oltin sotib olishni yana to‘xtatdi. Bu haqda Davlat statistika qo‘mitasi ma’lumotlari guvohlik bermoqda.
Spot’ning qayd etishicha, mamlakat yil boshidan buyon 1,3 milliard dollarlik oltin eksport qildi, ammo uning salmoqli qismi (1,2 milliard dollar) may oyiga to‘g‘ri keldi. Iyun oyi boshlarida O‘zbekiston yana 191 million dollarga eksport qilishga ulgurdi. Iyul oyiga kelib esa ushbu qimmatbaho metall eksportini to‘xtatdi.
Aksar mamlakatlarda oltin qazib oluvchilar uni o‘zlari eksport qiladi, ammo O‘zbekistonda yagona sotuvchi bu Markaziy bank hisoblanadi. U oltinni ishlab chiqaruvchilardan sotib oladi (masalan, Navoiy kon-metallurgiya kombinati) va boshqa mamlakatlarga (asosan, Shveysariyaga) eksport qiladi.
Markaziy bank boshqaruvi raisining o‘rinbosari Behzod Hamroyev oltin sotish ushbu metallarning narxi eng yuqori darajaga ko‘tarilsa, qayta tiklanishini aytgandi. May oyida oltin unsiyasi 1900 dollarga ko‘tarildi va O‘zbekiston bundan foydalanib oltin sotishni boshladi. Iyun oyida uning narxi yana tusha boshladi va ayni paytda unsiyasi 1782 dollarni tashkil qilmoqda.
Shunday sharoitda O‘zbekistonning oltin-valyuta zaxirasi 1-avgust holatiga ko‘ra, 35,1 milliard dollarni tashkil etdi. Bu iyul oyidagi ko‘rsatkichdan 964 dollarga ko‘p. Buning asosiy sababi — oltin. U endilikda 21,5 milliard dollarga teng (taxminan 367 tonna bo‘lib, avvalgi oydan qariyb 10 tonnaga ko‘p).
Izoh (0)